საზოგადოება

როგორც ერთობლივად ვებრძვით სტიქიას, ასევე ერთობლივად აღვადგენთ ჩვენს ბუნებას - პრემიერ-მინისტრი

საქართველოს პრემიერ-მინისტრის, გიორგი კვირიკაშვილის განცხადებით, საგანგებო შტაბი აგრძელებს 24-საათიან რეჟიმში მუშაობას ბორჯომის ხეობაში ხანძრის საბოლოო ლიკვიდაციამდე.

პრემიერმა აღნიშნა, რომ ცეცხლის ჩაქრობიდან მეორე დღესვე დაიწყება ტყის აღდგენითი სამუშაოები, სადაც მონაწილეობა ნებისმიერმა მსურველმა შეიძლება მიიღოს. არაა გამორიცხული სპეციალური ფონდიც შეიქმნაც.

„შტაბი აგრძელებს 24 საათის განმავლობაში მუშაობას, ჩვენ კიდევ ბევრი გვაქვს სამუშაო იმისათვის, რომ ცეცხლი ბოლომდე ჩავაქროთ და სანამ ცეცხლი ბოლომდე არ ჩაქრება, შტაბი გააგრძელებს დღე-ღამის განმავლობაში განუწყვეტლივ მუშაობას. ჩვენ ერთობლივი ძალებით აუცილებლად დავამარცხებთ ამ სტიქიას და აუცილებლად, მეორე დღიდანვე დავიწყებთ მუშაობას იმისათვის, რომ ეს ჩვენი უნიკალური ბორჯომის ტყე-პარკი აღვადგინოთ.

ამიტომ მინდა, ჩვენს მოსახლეობას ვუთხრა, რომ, რა თქმა უნდა, დანაკარგი მძიმეა, მაგრამ გული არ გავიტეხოთ, როგორც ერთობლივად ვებრძვით სტიქიას, ასევე ერთობლივად აღვადგენთ ჩვენს ბუნებას, ჩვენს ტყეს და შესაძლოა, შევქმნათ სპეციალური ფონდიც, სადაც ჩვენი მოსახლეობა, ჩვენი მეგობრები, ძალიან ბევრი ადამიანი იქნება ჩართული ამაში. ჩვენ ისევე გავალამაზებთ ამ ბუნებას, როგორიც ის ამ ხანძრამდე იყო. მოგეხსენებათ, საკმაოდ დიდი ფართობი დაიწვა“, - განაცხადა პრემიერმა.

პრემიერ-მინისტრმა ასევე მადლობა გადაუხადა ყველა იმ ქვეყანას: თურქეთს, აზერბაიჯანს, სომხეთსა და ბელორუსს, ვინც ამ დრომდე ეხმარება ქართულ მხარეს ცეცხლის ჩაქრობაში. მისი თქმით, ყოველ წუთას სხვადასხვა ქვეყანა გამოთქვამს დახმარების სურვილს.

შეგახსენებთ, მეოთხე დღეა, ბორჯომის ხეობაში ცეცხლს აქრობენ. საგანგებო შტაბის ინფორმაციით, ხანძარი ლოკალიზებულია და მისი გავრცელება შეჩერებულია. ადგილზე ქართველ სახანძრო- სამაშველო დანაყოფებს ეხმარებიან თურქეთი, აზერბაიჯანი, ბელორუსი და სომხეთი. დახმარება შესთავაზეს საბერძნეთმა, გერანიამ და რუმინეთმა.

ანა მებურიშვილი