საზოგადოება

როცა აფგან მუხთარლის საქმეს შსს იძიებდა, ჩვენს კითხვებზე პასუხი არ მიგვიღია - ლეილა მუსტაფაევა

აზერბაიჯანელი ჟურნალისტის, აფგან მუხთარლის მეუღლის ლეილა მუსტაფაევას თქმით, მას გამოძიებასთან დაკავშირებით ბევრი კითხვა დაუგროვდა, კერძოდ, ვისი მოთხოვნით გაიტაცეს აფგან მუხთარლი. ამის შესახებ მუსტაფაევამ პროკურატურაში დაკითხვის დაწყების წინ განაცხადა.

„ამ ორი თვის განმავლობაში, როდესაც პოლიცია გამოძიებას ატარებდა, ჩვენ არ მიგვიღია პასუხები ჩვენს კითხვებზე. ჩვენ დღემდე არ ვიცით, როგორ იყო აფგან მუხთარლი გატაცებული, ვინ გაიტაცა და რაც მთავარია, ვინ გასცა მისი გატაცების ბრძანება, ვინ აკონტროლებდა გატაცების ოპერაციას“, - თქვა მუსტაფაევამ.

მუხთარლის მეუღლე ასევე გამოეხმაურა შს მინისტრის განცხადებას უწყებიდან ორი მაღალჩინოსნის გათავისუფლების შესახებ. მუსტაფაევას თქმით, აღნიშნული მაღალჩინოსნები სისხლის სამართლის საქმის ფარგლებში უნდა მოქცეულიყვნენ.

„გარდა ამისა, გასულ კვირას შს მინისტრმა განაცხადა, რომ შს სამინისტროს ორი მაღალჩინოსანი თანამდებობიდან არის გადაყენებული. არ უნდა მომხდარიყო მათი გადაყენება. პირიქით, ისინი უნდა მოქცეულიყვნენ სისხლის სამართლის საქმის ფარგლებში და პასუხი გაეცათ კითხვაზე, მაგალითად, თუ როგორ დაუშვა სასაზღვრო პოლიციამ აფგან მუხთარლის გაყვანა. ასე რომ, მათი თანამდებობიდან გადაყენება არაფერს იძლევა. მათ უნდა გაეცათ კითხვაზე პასუხი თუ როგორ და რატომ დაუშვეს ეს“, - განაცხადა მუსტაფაევამ.

პროკურატურაში ლეილა მუსტაფაევასთან ერთად მისი ადვოკატი არჩილ ჩოფიკაშვილი იმყოფება. მისი ინფორმაციით, პროკურატურამ მუხთარლის საქმე 20 ივლისს გადაიბარა, ხოლო მუხთარლის საქმეზე გამოძიება სისხლის სამართლის კოდექსის 143-ე მუხლით მიმდინარეობს, რაც თავისუფლების უკანონოდ აღკვეთას გულისხმობს.

ანა მებურიშვილი