პოლიტიკა
რუსეთი პერსპექტივაში საქართველოსთან სავიზო რეჟიმის გაუქმებას არ გამორიცხავს- რუსეთის საგარეო საქმეთა სამინისტრო
რუსეთის საგარეო საქმეთა უწყება, გრიგორი კარასინისა და ზურაბ აბაშიძის პრაღაში გამართულ ბოლო შეხვედრას გამოეხმაურა.
როოგრც უწყების პრესსამსახურის მიერ გავრცელებულ განცხადებაშია ნათქვამი, მხარეებმა შეხვედრაზე 2016 წელს რუსეთ-საქართველოს ურთიერთობების ნორმალიზაციის პროცესის შედეგები განიხილეს.
„აღნიშნული პროცესი კვლავ იმ სფეროებს ეხება, სადაც პროგრესი შესაძლებელია დიპლომატიური ურთიერთობების არარსებობის მიუხედავად-ვაჭრობა, ტრანსპორტი, ჰუმანიტარული კონტაქტები“,-ნათქვამია განცხადებაში.
იქვე აღნიშნულია, რომ ორ ქვეყანას შორის ტვირთბრუნვა 17%-ით არის გაზრდილი და წინასწარი გათვლებით, 800 მილიონ დოლარს მიუახლოვდა.
„რუსეთი საქართველოს მთავარ პარტნიორთა სამეულში შედის და წარმოადგენს მისი საქონლის რეალიზაციისთვის მნიშვნელოვან ბაზარს. კერძოდ, გასულ წელს, რუსეთში ქართული ღვინის ექსპორტის ნახევარის რეალიზება მოხდა. დეკემბერში, პირველად მრავალი წლის შემდეგ, თბილისში, რუსეთისა და საქართევლოს სავაჭრო-სამრეწველო პალატებმა ორი ქვეყნის საქმიანი წრეების შეხვედრა გამართეს“,-აღნიშნავს რუსეთის საგარეო უწყება.
გარდა ამისა, განცხადების თანახმად, რუსეთ-საქართველოს ვაჭრობის ზრდამ საავტომობილო მიმოსვლა ორჯერ გაზარდა. გარდა ამისა, მოქმედებენ ავტობუსების ოცზე მეტი მარშრუტი, სრულდება რეგულარული ავიარეისები მოსკოვს, სანქტ-პეტერბურგს, ეკატერინბურგს, როსტოვს, სამარასა და თბილისს, ბათუმსა და ქუთაისს შორის.
„შეხევდრაზე, 2011 წლის 9 ნოემბრის საბაჟო ადმინისტრირების შეთანხმებასა და ტვირთის მონიტორინგის ამოქმედების საჭიროებას გაესვა ხაზი. მხარეებმა არ უნდა გააჭიანურონ ამ შეთანხმების პრაქტიკული რეალიზაცია, რომელიც რეგიონალური ვაჭრობისთვის უკიდურესად მნიშვნელოვანია. რუსული მხარე მისი პრაქტიკული რეალიზაციისთვის მზად არის.
მხარეებმა ადამიანებს შორის კონტაქტების ზრდის ინტენსივობა აღნიშნეს. საქართველოს მოქალაქეებისთვის 2015 წელს დაწესებული სავიზო ლიბერალიზაციის შედეგად, ვიზების რაოდენობის გაცემა გაორმაგდა და 40 ათასი შეადგინა. გ. კარასინმა დაადასტურა მზაობა სავიზო რეჟიმის გამარტივებასთან დაკავშირებით, ასევე არ გამორიცხა, პერსპექტივაში, მისი საბოლოო გაუქმება. ეს, მათ შორის საქართევლოს მთავრობაზეც არის დამოკიდებული“,-ნათქვამია განცხადებაში.
გრიგორი კარასინისა და ზურაბ აბაშიძის მომდევნო შეხვედრა პრაღაში მაისში გაიმართება.
მონიკა დავლიანიძე