კონფლიქტის ზონა

რუსეთის პრეზიდენტის გადაწყვეტილება ოკუპირებული ტერიტორიების სრული ანექსიის გეგმის ნაწილია - თამარ კეკენაძე

პარტია „თავისუფალი დემოკრატების“ გენერალური მდივნის, თამარ კეკენაძის შეფასებით, რუსეთის პრეზიდენტის მიერ დამტკიცებული წინადადება თვითაღიარებული სამხრეთ ოსეთის ე.წ. შეიარაღებული ძალების ქვედანაყოფის რუსეთის ჯარში შესვლის შესახებ არის ოკუპირებული ტერიტორიების სრული ანექსიის ნაწილი.

„ყველამ ვიცით, რომ პუტინს აქვს ჩვენი ოკუპირებული ტერიტორიების სრული ანექსიის ძალიან ზუსტი გაცხადებული გეგმა და გასაკვირია, რატომ აღიქმება სიურპრიზად ჩვენი მთავრობისთვის ოკუპანტის მხრიდან ამ მიმართულებით გადადგმული ყოველი ნაბიჯი. ე.წ. სამხრეთ ოსეთის საჯარისო შენაერთების რუსეთის შეიარაღებული ძალების შემადგენლობაში შესვლის გადაწყვეტილება სწორედ ამ გეგმის ნაწილია და რუსეთის მხრიდან ეს ძალიან დიდი ხანია მზადდება“, - განაცხადა კეკენაძემ.

კეკენაძის თქმით, მთავრობამ ყველა საერთაშორისო შეხვედრის დღის წესრიგში უნდა დააყენოს ოკუპირებული ტერიტორიების შესაძლო ანექსიის საკითხი და იმუშაოს ამ კუთხით რუსეთის ნაბიჯების აღსაკვეთად.

„ჩვენ „თავისუფალი დემოკრატები“ მუდმივად მოვუწოდებთ მთავრობას, რომ საქართველოს ოკუპაცია უნდა იყოს ყველა მაღალი დონის საერთაშორისო შეხვედრის დღის წესრიგში და ხელისუფლება უნდა უზრუნველყოფდეს, რომ პუტინსა და ოკუპანტ რუსეთზე პრევენციულად, უწყვეტ რეჟიმში ხორციელდებოდეს საერთაშორისო ზეწოლა“, - თქვა კეკენაძემ.

„თავისუფალი დემოკრატების“ გენერალური მდივნის შეფასებით, რეალობა საგანგაშოა, მაგრამ მთავრობა არ დგამს ნაბიჯებს ამ სიტუაციის გამოსასწორებლად.

„დღეს გვაქვს საგანგაშო რეალობა, ნაცვლად იმისა, რომ „ქართული ოცნება“ ჩვენი პარტნიორების მხარდაჭერის სრულ კონსოლიდაციას ახდენდეს, ხელისუფლება სრული შემადგენლობით, საკუთარი განცხადებებითა და ქმედებებით მიზანმიმართულად ახდენს ევროპული ინსტიტუტებისა და ჩვენი მეგობრების დისკრედიტაციას, და კიდევ უფრო მეტად უწყობს ხელს რუსული საქმის განხორციელებას საქართველოში“, - განაცხადა თამარ კეკენაძემ.

შეგახსენბთ, რომ რუსეთის პრეზიდენტმა ბრძანებას მოაწერა ხელი, რომელიც ოკუპირებული რეგიონის ე.წ. შეიარაღებული ჯარების ცალკეული დანაყოფების რუსეთის სამხედრო ძალებში შესვლას გულისხმობს. ინიციატივის ავტორია ვლადიმირ პუტინი.

ანა მებურიშვილი