ეკონომიკა

რუსეთის შემდგომი სამიზნე თბილისის გაზგამანაწილებელი სისტემა იქნება - რომან გოცირიძე

ნაციონალური მოძრაობის წევრი, რომან გოცირიძე ,,მოღალატურს’’ უწოდებს მთავრობის გადაწყვეტილებას გაზპრომის პირობებთან დათანხმების შესახებ.

მისი შეფასებით, აღნიშნული გადაწყვეტილება აჩვენებს, რომ ხელისუფლება განიცდის რუსეთის გავლენას.

გოცირიძის თქმით, მთავრობამ კაპიტულაცია მოახდინა და გაზპრომთან დაკავშირებით მიღებულ გადაწყვეტილებაში პირადი ინტერესებიც იკვეთება.

,,ყველა არგუმენტი, რაც შარშან ჰქონდა მთავრობას „გაზპრომთან“ დათმობაზე წასვლის გასამართლებლად, ამოწურულია. შაჰდენიზის საერთაშორისო კონსორციუმმა 500 მილიონი კუბური მეტრი გაზი გამოგვიყო დამატებით და ბაქო-თბილისი-ერზრუმის გაზსადენშიც გატარების უფლება მოგვცა. მიუხედავად ამისა, მთავრობამ კაპიტულაცია მოახდინა. აქ იკვეთება პირადი ინტერესებიც და ამას ადრე თუ გვიან ფარდა აეხდება. რუსეთის შემდგომი სამიზნე თბილისის გაზგამანაწილებელი სისტემა იქნება, რომელიც „ყაზტრანსგაზის“ საკუთრებაშია. ამის შემდეგ კი რკინიგზა. ესაა მცოცავი ეკონომიკური ანექსია“, - განაცხადა რომან გოცირიძემ.

ცნობისათვის, ქართული მხარე რუსეთიდან სომხეთში გაზის ტრანზიტის საფასურის გადახდის ფორმასთან დაკავშირებით „გაზპრომ ექსპორტის“ მოთხოვნას დათანხმდა.

როგორც ენერგეტიკის მინისტრმა, კახა კალაძემ განაცხადა, მინისტრთა კაბინეტმა ხელშეკრულების ახალი პირობების შესაბამისად გაფორმების გადაწყვეტილება მიიღო.

ნინო ექვთიმიშვილი