კონფლიქტის ზონა

რუსი ოკუპანტები სოფელ ატოცთან რკინის ბოძებს ამონტაჟებენ

ქარელის მუნიციპალიტეტის სოფელ ატოცთან ცხინვალის საოკუპაციო რეჟიმის წარმომადგენლების მიერ უკანონო ბორდერიზაციის პროცესი მიმდინარეობს. ისინი რკინის ბოძებს ამონტაჟებენ იმ ტერიტორიაზე, რომელსაც მოსახლეობა საძოვრებად და სახნავ-სათეს მიწებად იყენებს.

რუსი ოკუპანტები ატოცში დღეს დილით გამოჩნდნენ და სადემარკაციო სამუშაოები განაახლეს.

ადგილობრივების თქმით, მათ თავიანთ მიწის ნაკვეთებზე საშემოდგომო სამუშაოები დაასრულეს, მაგრამ ე.წ. სასაზღვრო ბარიერის დამონტაჟების გამო მოსავალს ვეღარ აიღებენ.

„ღობავენ და იკავებენ, მიაქვთ ნაკვეთები, დაკარგული 30 ჰექტარზე მეტი იყო და ახლა კიდევ მოუმატებენ, რა, მაგათი ნება არაა? თუ მივედით ახლოს, წაგვიყვანენ“, -თქვა ერთ-ერთმა ადგილობრივმა.

სოფლის ერთ ნაწილში მავთულხლართები 2008 წლის შემდეგ არის გავლებული, ახლა კი ბოძების მონტაჟი დანარჩენ პერიმეტრზე მიმდინარეობს.

ოკუპირებული სამხრეთ ოსეთის დე-ფაქტო უშიშროების კომიტეტის ინფორმაციით, 2018 წლის 1 ნოემბრიდან ცხინვალის საოკუპაციო რეჟიმმა სოფელ ბალთასთან, რომელიც ქარელის რაიონის სოფელ ატოცს ემიჯნება, მავთულხლართების მონტაჟი განაახლა. დე-ფაქტო უწყების ცნობით, აღნიშნულ ტერიტორიაზე დაახლოებით 1-კილომეტრიანი სიგრძის ბარიერი გაკეთდება.