საზოგადოება

რუსთავი 2-ს ხანძრის შედეგად 300 ათას ლარამდე ზარალი მიადგა

პირველადი შეფასებით, "რუსთავი 2"-ში გაჩენილი ხანძრის შედეგად ზარალი 300 ათას ლარს აღწევს. წინასწარი დათვლებით, მხოლოდ დაზიანებული ტექნიკის ღირებულება 100 ათასი ლარია, ამას ემატება განადგურებული დეკორაციების ღირებულება.

ინფორმაციას რუსთავი 2 ავრცელებს.

შეგახსენებთ, რომ ხანძარი სამაუწყებლო კომპანიის მთავარი ოფისის ცენტრალურ ნაწილში გაჩნდა. ეს ის ადგილია, სადაც მთავარი საკომუნიკაციო არხები გადის და ტელევიზიის სამი მთავარი სტუდია ერთმანეთს უკავშირდება. მეხანძრეების მოსვლამდე, ცეცხლის ჩაქრობა ტელევიზიის უსაფრთხოების სამსახურის თანამშრომლებმა დაიწყეს. სისტემური ხარვეზის გამო რამდენიმე წუთით გაითიშა "რუსთავი 2"-ის მაუწყებლობა.

დამწვარია კომპიუტერული ტექნიკის ნაწილი, დეკორაციები, განათებები და ელექტრო ხელსაწყოები.

ნინო ექვთიმიშვილი