საზოგადოება

რუსთავის „აზოტიდან“ გათავისუფლებული მუშების მხარდასაჭერი აქცია-მსვლელობა ფიზიკური დაპირისპირების ფონზე გაიმართა

თბილისში თავისუფლების მოედნის მიმართულებით 26 იანვარს რუსთავის „აზოტიდან“ გათავისუფლებული 350 მუშის მხარდასაჭერი აქცია-მსვლელობა გაიმართა.

პროტესტის ორგანიზატორია საქართველოს პროფესიული კავშირების გაერთიანება. მასში ასევე მიიღეს მონაწილეობა სტუდენტურმა გაერთიანებებმა.

აქციის დროს მოხდა ფიზიკური დაპირისპირება აქციის მონაწილეებსა და სამართალდამცავებს შორის.
პოლიცია მათ შენიშვნებს აძლევდა საზოგადოებრივი წესრიგის დარღვევის შესახებ, რამაც გამოიწვია სიტყვიერი და ფიზიკური დაპირისპირება.

აქციის ფეისბუქ გვერდზე წერია, რომ მსვლელობის მთავარი მიზანი „მუშების სამსახურში უპირობო აღდგენაა“.

„რამდენიმე დღის წინ, სამმართველოს შენობაში შესულ მუშებსა და სტუდენტებს პოლიცია სასტიკად გაუსწორდა, რაც იმას ნიშნავს, რომ სახელმწიფოში მხოლოდ დიდი კორპორაციებისა და კერძო ბიზნესის ინტერესებია დაცული, ამიტომაც აზოტის ამჟამინდელი მფლობელები უკან დახევას არ აპირებენ, ისინი უარს ამბობენ იმ მოთხოვნების შესრულებაზე, რომლებიც გულისხმობს 350 ადამიანის დაუყოვნებლივ აღდგენას, ახალი შრომითი ხელშეკრულებების გაფორმებას.

მოვუწოდებთ ხელისუფლებას პროცესში ჩაერთოს არა ძალის გამოყენებით, არამედ ხელი შეუწყოს მშრომელთა მოთხოვნების აღსრულებას, ასევე პრაქტიკაში განახორციელოს კანონი, რომელიც ბანკებს უკრძალავს არაპროფილური ბიზნესის ფლობას, შექმნას რეალური შრომის ინსპექცია, რათა მშრომელებს ჰქონდეთ უსაფრთხო და ღირსეული სამუშაო პირობები. დაუშვებელია დიდი, სტრატეგიული საწარმოები იყოს ერთი ინვესტორის, მით უმეტეს, ბანკის მფლობელობაში.

მოვითხოვთ გათავისუფლებული მუშების უპირობო აღდგენას!

საწარმო ეკუთვნის მშრომელებს და იმ ადამიანებს, რომლებიც რეალურად ქმნიან დოვლათს და ხელს უწყობენ ქვეყნის ეკონომიკის განვითარებას! “- წერია აქციის ფეისბუქ გვერდზე.

შეგახსენებთ, რომ 26 იანვარს სს „რუსთავის აზოტმა“ 350 ადამიანი გაათავისუფლა.

ანა მებურიშვილი