საზოგადოება

სააგენტოს `აწარმოე საქართველოში` მუშაობა არაეფექტურია - „ლელოს` ეკონომიკური გუნდის წევრი გიგლა მიქაუტაძე

„სააგენტოს "აწარმოე საქართველოში" მუშაობა არაეფექტურია“ - ამის შესახებ ,,ლელოს’’ ეკონომიკური გუნდის წევრმა გიგლა მიქაუტაძემ განაცხადა.

მისივე განმარტებით, გასულმა შვიდმა წელმა აჩვენა, რომ “ქართული ოცნების“ მთავრობას სერიოზული ინვესტორები არ ენდობიან და არ ინტერესდებიან საქართველოში ინვესტირებით. აქედან გამომდინარე, გიგლა მიქაუტაძის თქმით, მთავრობის ნებისმიერი ახალი გეგმა თუ დაპირება მხოლოდ ცარიელი სიტყვები და ტყუილია.

„ქვეყანაში შემოსული ინვესტიციები წლიდან წლამდე იკლებს და ამაზე პასუხისმგებლობა, სხვა სახელმწიფო უწყებებთან ერთად, სააგენტოს "აწარმოე საქართველოში" ეკისრება, რომლის პირდაპირი ფუნქციაა ქვეყნის ცნობადობის გაზრდა და პოტენციურ ინვესტორებთან მუშაობა. 2019 წლის 3 კვარტალში პირდაპირი უცხოური ინვესტიციები 2018 წლის ანალოგიურ მაჩვენებელთან შედარებით 17%-ით, ხოლო 2017 წლის მონაცემებთან მიმართებით 37 %-ით არის შემცირებული. სააგენტოს მუშაობა არაეფექტურია სხვა მიმართულებებშიც. მაგალითად, ბუტაფორიული პროგრამა "საკრედიტო-საგარანტიო ფონდის" სახით, რომელსაც უნდა გაეზარდა მცირე და საშუალო მეწარმეების წვდომა ფინანსებზე, რეალურად არ ფუნქციონირებს. აღნიშნულ ფონდში, თითქოსდა, აკუმულირებული 20 მლნ ლარით ჯერჯერობით არც ერთი კომპანია არ დაფინანსებულა. ფაქტია, რომ ყოველწლიურად სააგენტო ათეულობით მილიონ ლარს ხარჯავს სხვადასხვა პროგრამაზე, თუმცა მან ვერ უზრუნველყო ქვეყანაში მნიშვნელოვანი რაოდენობის ახალი სამუშაო ადგილი და დასაქმების ბაზარზე ვითარების გაუმჯობესება’’, - განაცხადა გიგლა მიქაუტაძემ.