უახლესი ამბები
არქივი
საზოგადოება
სააპელაციო-საკასაციო პროცედურების დასრულებამდე საპატრიარქო არ გამოიტანს საბოლოო გადაწყვეტილებას დეკანოზ გიორგი მამალაძის მიმართ
წმინდა სინოდის გადაწყვეტილებით, ე.წ. „ციანიდის საქმეზე“ გამოტანილი განაჩენის მიმართ სააპელაციო-საკასაციო პროცედურების დასრულებამდე საპატრიარქო თავს შეიკავებს, დეკანოზ გიორგი მამალაძის მიმართ საბოლოო დასკვნა გააკეთოს. ამის შესახებ ნათქვამია საპატრიარქოს ოქმში.
„წმინდა სინოდმა დაადგინა: მიუხედავად იმისა, რომ დეკანოზ გიორგი მამალაძის მიმართ სამოქალაქო სასამართლომ გამოიტანა გამამტყუნებელი განაჩენი და მას მიუსაჯა 9 წლით თავისუფლების აღკვეთა, დღეისთვის განაჩენი გასაჩივრებულია სააპელაციო სასამართლოში. ასევე იმის გამო, რომ ამ საკითხის ირგვლივ არსებობს მაღალი საზოგადოებრივი ინტერესი და გამოითქმის ურთიერთგამომრიცხავი პოზიციები, მოცემულ ეტაპზე, ვიდრე დეკანოზ გიორგი მამალაძის განაჩენის მიმართ სააპელაციო-საკასაციო პროცედურები არ არის დასრულებული, წმინდა სინოდი არ მიიჩნევს მიზანშეწონილად, კანონიკური სამართლის ფორმატში დაიწყოს დეკანოზ გიორგი მამალაძის საქმის განხილვა, რაც ამ საქმის ირგვლივ არსებულ მდგომარეობას კიდევ უფრო დაამძიმებდა. შესაბამისად, წმინდა სინოდი თავს იკავებს დეკანოზ გიორგი მამალაძის მიმართ საბოლოო დასკვნების გაკეთებისგან.
აღნიშნული სააპელაციო-საკასაციო პროცედურების დასრულების შემდგომ წმიდა სინოდი საეკლესიო კანონების მიხედვით საფუძვლიანად შეისწავლის საქმის არსს, რაც ეკლესიაში საბოლოო ერთიანი პოზიციის ჩამოყალიბებას შეუწყობს ხელს”, - ნათქვამია განჩინებაში.
შეხვედრის ოქმის მიხედვით, მამა გიორგი მამალაძის საქმეზე სიტყვით გამოვიდა ჭყონდიდელი მიტროპოლიტი პეტრე ცაავა. ასევე მსჯელობაში მიიღეს მონაწილეონა ახალციხისა და ტაო-კლარჯეთის მიტროპოლიტმა თეოდორემ, ახალქალაქისა და კუმურდოს მიტროპოლიტმა ნიკოლოზმა, ბოდბელმა ეპისკოპოსმა იაკობმა, რუსთველმა მიტროპოლიმა იოანემ, გარდაბნისა და მარტყოფის ეპისკოპოსმა იოანემ და სხვა მღვდელმთავრებმა.