საზოგადოება

საავადმყოფოს პრივატიზაციას კორუფციის სუნი ასდის - რომან გოცირიძე

აჭარის ეკონომიკისა და მდგრადი განვითარების სამისნიტრომ ბათუმში მდებარე ფსიქიატრიული საავადმყოფოს 100%-ი აუქციონზე გაიტანა.

შენობის ახალი მესაკუთრის ვინაობა 30 დეკემბერს გახდება ცნობილი.

საავადმყოფოს საწყისი ფასია 100 ათასი ლარი.

აუქციონის პირობების თანახმად, მყიდველმა ხელშეკრულების გაფორმებიდან 8 თვეში უნდა უზრუნველყოს შენობისათვის საჭირო სარემონტო/სარეკონსტრუქციო სამუშაოების დაწყება, რაც არაუგვიანეს 36 თვეში უნდა დასრულდეს.

სავალდებულო პირობაში ეკონომიკის სამინისტროს ასევე მითითებული აქვს, რომ 10 წლის განმავლობაში საავადმყოფოს სამედიცინო პროფილი არ უნდა შეეცვალოს.

როგორც ნაციონალური მოძღაობის წევრმა რომან გოცირიძემ პარლამენტის რიგგარეშე სხდომაზე განაცხადა, საავადმყოფოს პრივატიზაციას „კორუფციის სუნი ასდის“.

გოცირიძემ აღნიშნა, რომ პრივატიზაცია ბევრი მიმართულებით ფერხდება და მაშინ, როდესაც უამრავი საპრივატიზაციო ქონება ხელუხლებელია, ხელისუფლებამ რატომღაც გადაწყვიტა ისეთი ობიექტის გაყიდვა, რომელიც არის ერთადერთი და ემსახურება ჯანდაცვის სფეროს.

„ამ პრივატიზაციას კორუფციის სუნი ასდის და რატომ? ჯერ ერთი, ჯანდაცვის სფეროში მთელი სექტორი ფაქტობრივად, კერძო მფლობელობაშია და ეს უდიდესი მიღწევაა. არავინ ეწინააღმდეგება პრივატიზაციას, მაგრამ ცხადდება ტენდერი და მისი ვადა არის მხოლოდ ორი კვირა - 16 დეკემბერს გამოცხადდა და 30 დეკემბერს უნდა გაიყიდოს. ხშირ შემთხვევაში ირიბი ინდიკატორია წინასაახალწლოდ ობიექტის გაყიდვა და ბოლო დღეს კონკურენტების მოცილების მარტივი გზა არის. იქნებ ვინმემ თქვას, რომ ამის გაყიდვით შეიძლება რეგიონში არსებული მდგომარეობის გაუმჯობესება. მაშინ გადავხედოთ სატენდერო პირობებს - იყიდება 100 ათას ლარად, ერთოთახიანი ბინის ფასად. ამ ტერიტორიაზე, რომელიც არის 25 000 კვ. მიწა, შეიძლება ააშენონ ნებისმიერი რამ და ეს გამოყენებული იქნება, როგორც ჩანს, ბინათმშენებლობისთვის“, - განაცხადა გოცირიძემ.

მისი თქმით, პრივატიზაციის პროცესი სასწრაფოდ უნდა შეჩერდეს და გამოცხადდეს ახალი ტენდერი ახალი პირობებით, სადაც დაცული იქნება პროფილის შენარჩუნების პირობა.

მონიკა დავლიანიძე