საზოგადოება
საავტომობილო გზების დეპარტამენტი მძღოლებს მიმართავს
საავტომობილო გზების დეპარტამენტი მძღოლებს მიმართავს, რომ ქუთაისი-სამტრედიის შემოვლით გზაზე იმოძრაონ საავტომობილო წესების დაცვით და დაემორჩილონ საავტომობილო გზებზე დაწესებულ რეჟიმებს.
დეპარტამენტის ცნობით, დასავლეთის ქუთაისი-სამტრედიის მიმართულებაზე მოძრავი ავტოტრანსპორტი მოძრაობს ძველი თბილისი-სენაკი-ლესელიძის საავტომობილო გზის გამოყენებით, ქალაქ ქუთაისის გავლით.
აღმოსავლეთის მიმართულებით მოძრაობა ხორციელდება ცალმხრივად, სამტრედია-ქუთაისის მიმართულებაზე.
"აღნიშნულ მიმართულებაზე დაფიქსირდა მრავალი დარღვევა და დაწესებული რეჟიმის დაუმორჩილებლობა.
შექმნილი ვითარებიდან გამომდინარე, საავტომობილო გზების დეპარტამენტი გთხოვთ, იმოძრაოთ საავტომობილო წესების დაცვით და დაემორჩილოთ საავტომობილო გზებზე დაწესებულ რეჟიმებს.
ამჟამად საერთაშორისო მნიშვნელობის თბილისი-სენაკი-ლესლიძის საავტომობილო გზის ქუთაისის შემოსავლელი–სამტრედიის მონაკვეთზე საგზაო მოძრაობის უსაფრთხოების დამატებითი ღონისძიებების განხორციელება მიმდინარეობს, რომელიც მოიცავს: გარე განათების ქსელის მოწყობას, ხმაურიანი ზოლების და დამატებითი საგზაო ნიშნების მოწყობას, ვიდეო–სამეთვალყურეო სისტემის მოწყობას.
სამუშაოების დასრულებისთანავე ქუთაისის შემოვლითი-სამტრედიის მონაკვეთზე მოძრაობა აღდგება ორმხრივად და მძღოლები შეძლებენ იმოძრაონ განათებული, კიდევ უფრო უსაფრთხო და გამართული ინფრასტრუქტურით.
ამ დროისათვის საავტომობილო მიმოსვლა შსს საპატრულო პოლიციის უშუალო ზედამხედველობით და კოორდინაციით მიმდინარეობს",- ნათქვამია საავტომობილო გზების დეპარტამენტის ინფორმაციაში.