საზოგადოება
საბერძნეთში საქართველოს ერთი მოქალაქე მოვძებნეთ და ის ოჯახთან ერთადაა, მეორეს კი ვეძებთ - საქართველოს ელჩი საბერძნეთში
საბერძნეთში საქართველოს საგანგებო და სრულუფლებიანი ელჩის, იოსებ ნანობაშვილის ინფორმაციით, საქართველოს ერთ-ერთი მოქალაქე, რომელსაც ოჯახი ვერ პოულობდა, გადარჩენილია და უსაფრთხო ადგილას იმყოფება, მეორეს კი ამ დრომდე ეძებენ.
„დილის მერე ცხელ ხაზზე დამატებითი შეტყობინება დაზარალებულების შესახებ არ ყოფილა. იმ ორი ადამიანიდან, რომლებსაც ვეძებდით, ერთი განსაკუთრებული რისკის არეალში იყო, პრაქტიკულად ხანძრის ეპიცენტრში. მოვძებნეთ და ეს ქალბატონი არის ოჯახთან ერთად, უსაფრთხოდ. მეორე ადამიანს ვეძებთ,ასევე ველით საბერძნეთის შსს-ის ინფორმაციას გარდაცვლილებისა და ჰოსპიტალიზებულების შესახებ. იმედი გვაქვს, მათ შორის საქართველოს მოქალაქე არ იქნება“, - თქვა ელჩმა პირველ არხთან.
მისივე ინფორმაციით, საქართველოს მეორე მოქალაქე, რომელსაც ამ წუთებში ეძებენ, ბოლოს იმ არეალში დაფიქსირდა, სადაც ნაკლები საფრთხეა.
„პერსონალური მონაცემების გამჟღავნების უფლებამოსილება არ მაქვს, გიდასტურებთ, რომ იმ ორი ადამიანიდან, რომელსაც ვეძებდით, ერთ-ერთი მოძებნილია და ოჯახშია. მეორე ადამიანი კი ბოლოს იმ რეგიონში ნახეს, სადაც მსხვერპლი ფაქტობრივად არ ყოფილა და ამიტომ, იმედიანად ვართ. ამ ადამიანის ოჯახთან მუდმივ ვართ კავშირზე ვიმყოფებით“,-განაცხადა ელჩმა.
ნანობაშვილმა აღნიშნა, რომ სავარაუდოდ, კრიზისი საბერძნეთში უახლოეს მომავალში დაიძლევა.
„ხანძრის ჩაქრობა პროგრესირებს, ტემპერატურაც და ბუნებრივი პირობებიც ხელს უწყობს. იმედი გვაქვს, კრიზისი დაიძლევა უახლოეს მომავალში“,- განაცხადა ნანობაშვილმა.
ცნობისთვის, საბერძნეთში ბოლო ათწლეულის ყველაზე მასშტაბური ხანძარი მძვინვარებს, რასაც სულ მცირე, 60 ადამიანი ემსხვერპლა. მაშველებმა ზრდასრულთა და არასრულწლოვანთა 26 ცხედარი აღმოაჩინეს, რომლებიც ჩახუტებულები იყვნენ.
საქართველოს მოქალაქეებს საელჩოსთან დაკავშირება ცხელ ხაზზე, სატელეფონო ნომერზე +306995779793 შეუძლიათ.