სამართალი

საბიუჯეტო სახსრების ხარჯვის საქმეზე ორი მოწმე დაიკითხა

საბიუჯეტო სახსრების ხარჯვის საქმეზე დღეს, ბრალდების მხარის ორი მოწმე დაიკითხა, მათგან ერთთან, კერძოდ სახელმწიფო დაცვის სპეციალური სამსახურის საბუღალტრო მომსახურების დეპარტამენტის უფროსთან ქეთევან გოგოლაძესთან დაისვა ყველაზე მეტი კითხვა.

როგორც საქმეზე ერთ-ერთი ბრალდებულის თემურ ჯანაშიას ადვოკატმა ბექა ბასილაიამ განაცხადა, მოწმის ჩვენებით მტკიცდება, რომ ჯანაშიას ბრალი არის უსაფუძვლო.

„ბუღალტერმა დაადასტურა, რომ აბსოლუტურად იგივე ხარჯები გაიცემოდა ბიძინა ივანიშვილის პრემიერ-მინისტრობის დროსაც, რა ტიპის ხარჯიც გაიწეოდა თეიმურაზ ჯანაშიას სამსახურის უფროსობის პერიოდში, ანუ არანაირი კანონდარღვევა ჯანაშიას ქმედებებში არ არის. მოწმემ პირდაპირ თქვა, რომ საქართველოს პარლამენტის, ფინანსთა სამინისტროს და საქართველოს ხაზინის პირდაპირი და უშუალო ჩართულობით ხდებოდა თანხების გამოყოფა, შესაბამისად სამსახური ვალდებული იყო ეს თანხა დაეხარჯა. შესაბამისად, თეიმურაზ ჯანაშიას ბრალდების საფუძველი არ არსებობს. ამასთან ერთად მნიშვნელოვანია, რომ იდენტური გარემოებები გრძელდებოდა ჯანაშიას შემდეგაც და ამასთან დაკავშირებით ბრალდების მხარეს კითხვებიც კი არ აქვს, ხოლო ჯანაშიას 7-დან 11 წლამდე ემუქრება. ეს არის შერჩევითი სამართალი. 8 მილიონ სამასი ათასს ედავებიან თეიმურაზ ჯანაშიას 4 წლის მანძილზე, ამ თანხაში, 7 მილიონ ლარზე მეტი დახარჯულია ავიაბილეთებზე, კვებაზე, ტრანსპორტზე, სასტუმროს ხარჯებზე. მოწმემ თქვა, რომ ეს ხარჯები 2013 წლის შემდეგაც გაიწეოდა“,- განაცხადა ბექა ბასილაიამ.
პროკურორ ქეთევან ჩაჩავას თქმით კი, მოწმის ჩვენებით დადასტურდა, რომ თანხები სახელმწიფო ბიუჯეტიდან არამიზნობრივად იხარჯებოდა.

„მოწმემ დაადასტურა, რომ წლის განმავლობაში 300 ათას ლარამდე ლეგალურად იხარჯებოდა საქართველოს ყოფილი პრეზიდენტისათვის კვების ხარჯები, მიუხედაავად ამისა, მიხეილ სააკაშვილი თავისი კომფორტისათვის განსაკუთრებით დიდი ოდენობის თანხებს ხარჯავდა სპეციალური სამსახურის საბიუჯეტო სახსრებიდან. ამ პერიოდში სამსახურის უფროსი იყო თეიმურაზ ჯანაშია და ნებისმიერი დოკუმენტი, რომელიც ამ ხარჯებს ადასტურებდა, გადიოდა მის ხელში და მისი უშუალო პასუხისმგებლობით ხდებოდა ამ თანხების ჩამოწერა. დაახლოებით 9 მილიონია დახარჯული და სახელმწიფო დაცვის სპეციალური სამსახურის ბალანსზე მხოლოდ 22 ველოსიპედია ამ თანხიდან. ბუღალტერის ჩვენებიდან დადასტურდა ის ფაქტი, რომ გრიფით საიდუმლო პატაკებით ხდებოდა კვების, მომსახურების, სხვადასხვა სუვენირების, საჩუქრების ჩამოწერა და ნებისმიერ ამ პატაკზე ედო თეიმურაზ ჯანაშიას ხელმოწერა, რომ ის პირადად იყო საქმის კურსში დიდი ოდენობით თანხების ფლანგვაზე“,- განაცხადა ქეთევან ჩაჩავამ.

დღევანდელ სასამართლო სხდომას ერთ-ერთი ბრალდებული თეიმურაზ ჯანაშია ესწრებოდა.

საქმეზე შემდეგი სასამართლო სხდომა მოსამართლე ბადრი კოჭლამაზიშვილმა ორშაბათს, 10 ივლისს ჩანიშნა.