საზოგადოება

საჭიროების შემთხვევაში მოსახლეობას პირბადეებს დავურიგებთ - დავით სერგეენკო

ჯანდაცვის მინისტრის, დავით სერგეენკოს ინფორმაციით, უწყება ბორჯომის ხეობის ჰაერის მონიტორინგს აწარმოებს. სერგეენკომ აღნიშნა, რომ დაკვამლიანების გაუარესების შემთხვევაში სამინისტრო მოსახლეობას პირბადეებს დაურიგებს.

„მიუხედავად იმისა, რომ ლოკალიზაციისკენ ტენდენცია გაჩნდა, მშრალი ამინდი და ქარი ართულებს შედეგის განმტკიცებას. ვფიქრობ, რომ საღამოსკენ უფრო ხელმოსაჭიდი შედეგები გვექნება. ჩვენ ვაკონტროლებთ და მჭიდრო მონიტორინგი გვაქვს ჰაერის ხარისხის. კვამლის მიმართულებამ მოიმატა. თუ საჭიროება გახდება, პირბადეების მარაგი გვაქვს, რომელსაც მოსახლეობას დავურიგებთ,“- განაცხადა სერგეენკომ.

უკვე მესამე დღეა ბორჯომის ხეობაში ხანძარია. მიუხედავად იმისა, რომ გუშინ მეხანძრეებმა ცეცხლის ლოკალიზება მოახდინეს, ქარის გამო ხანძრის კერები განახლდა. შექმნილი ვითარების გამო პრემიერ-მინისტრის გიორგი კვირიკაშვილის ბრძანებით საგანგებო შტაბი შეიქმნა.

ხანძრის ჩაქრობის სპეცოპერაცია დილიდან განახლდა. სახელმწიფო უსაფრთხოებისა და კრიზისების მართვის საბჭოს მდივნის, მინდია ჯანელიძის ინფორმაციით, ადგილზე სხვადასხვა უწყების 500-მდე წარმომადგენელი მუშაობს, მათ შორის 300 მეხანძრე-მაშველი.

გიორგი კვირიკაშვილის ინფორმაციით, ორი თურქული ვერტმფრენი ბათუმშია, ხოლო თვითმფრინავი დღის ბოლოს შეუერთდება მეხანძრე-მაშველებს.

ცეცხლის ჩაქრობას ამ დრომდე ცდილობენ.

ანა მებურიშვილი