კომენტარი

საგამოძიებო ორგანომ იმ კითხვებს უნდა უპასუხოს, რაც საზოგადოებაში გაჩნდა - არჩილ თალაკვაძე ტელეკომპანია „იბერიას“ და „ომეგა ჯგუფის“ სკანდალზე

საგამოძიებო ორგანომ გამოძიება დაიწყო და მან იმ კითხვებს უნდა უპასუხოს, რაც საზოგადოებაში გაჩნდა, - ასე გამოეხმაურა საპარლამენტო უმრავლესობის ლიდერი, არჩილ თალაკვაძე გუშინ გავრცელებულ ფარულ აუდიო-ჩანაწერებს, რომელშიც სავარაუდოდ, "ომეგა ჯგუფის" წილების გადანაწილებაზეა საუბარი.

"გამოძიების დაწყების საკითხი პოლიტიკოსებმა არ უნდა გადაწყვიტონ. არსებობს კანონმდებლობა, საკანონმდებლო გარანტიები და ინსტიტუტები, რომლებიც გამოძიებაზე არიან პასუხისმგებელი. შესაბამისად, როგორც ნახეთ საგამოძიებო ორგანომ გამოძიება დაიწყო და მან იმ კითხვებს უნდა უპასუხოს, რაც საზოგადოებაში გაჩნდა. რაც შეეხება მედიას, ჩვენთვის მნიშვნელოვანია თავისუფალი, კრიტიკული და დამოუკიდებელი მედია, ვინაიდან საქართველოს განვითარების გრძელვადიან პერსპექტივაში თავისუფალი მედია ერთ-ერთი მნიშვნელოვანი გარანტიაა. დღეს მედია არის თავისუფალი, მედია საშუალებების რაოდენობა არის გაზრდილი, ჟურნალისტებს აქვთ თავისუფალი საქმიანობის უფლება და თუ ამ ღირებულებებს რაიმე შეკითხვები დაისმის, ამას პასუხი უნდა გაეცეს", - განაცხადა არჩილ თალაკვაძემ.

შეგახსენებთ - ფინანსთა სამინისტრო „ომეგა ჯგუფს“ დაახლოებით 51 მილიონ ლარს ედავება. კომპანია ვალს აღიარებს და მის რესტრუქტურიზაციას ითხოვს, თუმცა ფინანსთა სამინისტრო არ ეთანხმება „ომეგა ჯგუფის“ მიერ შეთავაზებულ საგადასახადო პირობებს. „ომეგა ჯგუფის“ და „იბერიის“ ერთერთმა დამფუძნებელმა ზაზა ოქუაშვილმა განაცხადა, რომ ხელისუფლება ფინანსურ ზეწოლას ახორციელებს და ეს პირდაპირ აისახება ტელევიზიის მუშაობაზე. მან თქვა, რომ ზეწოლის მიზეზი „იბერიაა“, რომლის გადაცემათა შინაარსით უკმაყოფილონი არიან მმართველი წრეები.

გავრცელდა სკანდალური აუდიოჩანაწერები, რომელშიც სპორტის ყოფილი მინისტრი ლევან ყიფიანი „ომეგა ჯგუფის" მფლობელს და ტელეკომპანია "იბერიას" დამფუძნებელს ზაზა ოქუაშვილს სატელეფონო საუბრისას ბიზნესში პრობლემების მოგვარების სანაცვლოდ ტელეკომპანიის დათმობას სთხოვს, ასევე საუბარია ორი მილიონი აშშ დოლარის სანაცვლოდ სახელმწიფო ბიუჯეტის წინაშე არსებული დავალიანების რესტრუქტურიზებაზე და პრობლემების მოგვარებაზე. აღნიშნული ჩანაწერების გარდა, „რუსთავი2“-მა გუშინ კიდევ ერთი ფარული ჩანაწერი გააავრცელა, რომელშიც სავარაუდოდ, „ომეგა ჯგუფის“ წილების გადანაწილებაზე იყო საუბარი.