საზოგადოება
საგანმანათლებლო დაწესებულებების ავტორიზაციისა და საგანმანათლებლო პროგრამების აკრედიტაციის სააპელაციო საბჭო შეიქმნა
საქართველოს პრემიერ-მინისტრის 2016 წლის 17 ოქტომბრის ბრძანებით, საგანმანათლებლო დაწესებულებების ავტორიზაციისა და საგანმანათლებლო პროგრამების აკრედიტაციის სააპელაციო საბჭოს წევრები დაინიშნენ.
სააპელაციო საბჭოს შექმნით, საქართველოში მოქმედ საგანმანათლებლო დაწესებულებებს პირველად ეძლევათ შესაძლებლობა ავტორიზაციისა და აკრედიტაციის საბჭოების მიერ მიღებული გადაწყვეტილებების გასაჩივრების მიზნით, გასაჩივრების ახალი პროცედურით ისარგებლონ, რომლის მიხედვით, მოხდება გადაწყვეტილებების შინაარსობრივი განხილვა და შეფასება, _ აცნობეს მედიანიუსს განათლების სამინისტროდან.
სააპელაციო მექანიზმის დანერგვა წარმოადგენს ევროპის ხარისხის უზრუნველყოფის სააგენტოების ასოციაციისა და ევროკავშირის ექსპერტების მიერ შემუშავებულ ერთ-ერთ ძირითად რეკომენდაციას, რომელიც ასევე ასახულია იყო სსიპ - განათლების ხარისხის განვითარების ეროვნული ცენტრის სტრატეგიულ გეგმაში.
სამინისტროში აცხადებენ, რომ აღნიშნული მექანიზმის ამოქმედებით საქართველოში მოქმედი განათლების ხარისხის უზრუნველყოფის სისტემა შესაბამისობაში მოვიდა უმაღლესი განათლების ევროპული სივრცის ხარისხის უზრუნველყოფის სტანდარტებსა და სახელმძღვანელო პრინციპებთან. აღნიშნული მექანიზმის დამკვიდრება ხელს შეუწყობს განათლების ხარისხის განვითარებასა და ამაღლებას, განათლების ხარისხის განვითარების ეროვნული ცენტრის გაწევრიანებას ევროპის ხარისხის უზრუნველყოფის სააგენტოების ასოციაციაში, საერთაშორისო დონეზე საქართველოში მოქმედი საგანმანათლებლო დაწესებულებების მიერ მინიჭებული კვალიფიკაციების აღიარებასა და სანდოობას.