სამართალი
საიამ სასამართლოს თბილისის მერიის წინააღმდეგ სარჩელით მიმართა
საქართველოს ახალგაზრდა იურისტთა ასოციაციამ თბილისის საქალაქო სასამართლოს სარჩელით მიმართა. საქმე ეხება თბილისის მერიის მიერ, ,,პარტიზანული მებაღეობის“ წევრებისთვის მერიის მიმდებარედ არსებულ სკვერში კარვის გაშლის აკრძალვას.
საია-ს იურისტების განცხადებით, აღნიშნული გადაწყვეტილებით, მერიამ შეკრებისა და მანიფესტაციების თავისუფლება დაარღვია.
,,თბილისის მერიამ ,,პარტიზან მებაღეებს“ აუკრძალა სკვერის ერთ ნაწილში კარვის განთავსება, ჩვენ შეგვაქვს სარჩელი თბილისის საქალაქო სასამართლოში, რომლითაც ვითხოვთ ამ გადაწყვეტილების უკანონოდ ცნობას. მიგვაჩნია, რომ ეს გადაწყვეტილება არღვევს შეკრების უფლებას და ეწინააღმდეგება იმ მიზნებს, რა მიზნებითაც ზოგადად, ადმინისტრაციულ ორგანოს აქვს უფლება, რომ შეზღუდვები დააწესოს“, - განაცხადა საია-ს იურისტმა ნონა ქურდოვანიძემ.
მისი თქმით, ორგანიზაცია სასამართლოსგან სარჩელის დაჩქარებულ, ორი დღის ვადაში განხილვას ითხოვს.
,,გვინდა, რომ სასამართლომ გამოიყენოს განხილვის სპეციალური ვადა, რადგან თუ გამოყენებული იქნება განხილვის ჩვეულევრივი ვადები, ასეთ შემთხვევაში დავა შესაძლოა რამდენიმე წლის განმავლობაში გაგრძელდეს“, - აღნიშნა ნონა ქურდოვანიძემ.
მარი ნამგალაძე