საზოგადოება

საკაბელო ოპერატორების ნაწილმა ექვსი ქართული არხი პროტესტის ნიშნად გათიშა

საკაბელო ოპერატორების ნაწილმა ექვსი ქართული არხის მაუწყებლობა, პროტესტის ნიშნად გათიშა.

ამის მიზეზი ტელეკომპანია „მაესტროს“, „იმედის“, GDS, „რუსთავი2“, „მარაოს“ და კომედი არხის გადაწყვეტილება გახდა, რომლის თანახმად, ტელევიზიებს სიგნალის გავრცელებისთვის საკაბელო ოპერატორებმა თანხა უნდა გადაუხადონ. საუბარია დამატებით 2 ლარზე.

„ამ ეტაპზე სამწუხაროდ საკაბელო ოპერატორებმა ამოწურეს მოლაპარაკებების წარმოების ყველანაირი შესაძლებლობა. ამიტომ მათ მიიღეს გადაწყვეტილება საპროტესტოდ, დღეს 12:00-დან ეტაპობრივად ყველამ გათიშოს მითითებული არხები.

თუ ეს არხები ხდება ფასიანი ჩვენ გვაქვს თხოვნა, რომ ამ არხებმა გამოაცხადონ, რომ მოსახლეობას ვუთხრათ, რომ „ჩვენი არხები ხდება ფასიანი და ვისაც გსურთ რომ უყუროთ ჩვენს არხს თქვენ უნდა გადაიხადოთ ფული, თქვენ უნდა გამოიწეროთ ჩვენი არხი“,- განაცხადა პრესკონფერენციაზე საკაბელო ოპერატორების წარმომადგენელმა თეონა ბერუაშვილმა.

საკაბელო კომპანიები კი, დისკრიმინაციულ მიდგომაზე საუბრობენ.

„ნიუკომის“ ხელმძღვანელმა ზაზა აგლაძემ განაცხადა, რომ „თუ სხვებს ეკუთვნის უფასოდ ამ არხების ტრანსლირება, იგივე უნდა ხდებოდეს პატარა საკაბელო ოპერატორებისთვის“.

აღნიშნულს საკაბელო ოპერატორი „მაგთიკომი“ გამოეხმაურა და აღნიშნა, რომ „მსოფლიოში აპრობირებული პრაქტიკაა, რომ ტელეარხები სატრანზიტო მაუწყებლებს მათი არხების ტრანსლირების სანაცვლოდ, გარკვეული საფასურის გადახდას სთხოვენ. ქართულმა არხებმაც მისდიეს აღნიშნულ საერთაშორისო პრაქტიკას, რასთანაც „მაგთიკომს“ პრინციპული წინააღმდეგობა ვერ ექნება. „მაგთიკომი“ ყველა უცხოურ და ქართულ ტელეარხთან, ან კონტენტ პროვაიდერთან მუდმივად აწარმოებს მოლაპარაკებას და ეს შემთხვევაც არ არის გამონაკლისი. „მაგთიოკომი“ ვერ დატოვებს მომხმარებლებს რეიტინგული ქართული არხების გარეშე და აუცილებლად გააგრძელებს მათთვის ქართული ტელეარხების მიწოდებას“,-ნათქვამია განცხადებაში.

მონიკა დავლიანიძე