საზოგადოება

სახალხო დამცველი შრომით უსაფრთხოებასთან და შრომის ინსპექციასთან დაკავშირებით კამპანიას იწყებს

საქართველოს სახალხო დამცველის, უჩა ნანუაშვილის განცხადებით, ომბუდსმენის აპარატი შრომით უსაფრთხოებასთან და შრომის ინსპექციასთან დაკავშირებით კამპანიას იწყებს.

მისი თქმით, აუცილებელია, რომ პროცესში ყველა გადაწყვეტილების მიმღები პირი იყოს ჩართული, ასევე საზოგადოების აზრის მობილიზება და გააქტიურება ამ მიმართულებით.

ნანუაშვილმა ასევე ხაზი გაუსვა სამუშაო ადგილებზე დაღუპულთა სტატისტიკას. მისი თქმით, ხელისუფლებამ არაფერი არ გააკეთა ამ შემთხვევათა პრევენციისთვის.

„2011-2016 წლებში 270-ზე მეტი ადამიანი დაიღუპა სამუშაო ადგილზე, ხოლო 776-ზე მეტი დასახიჩრდა. სამწუხაროდ, ხელისუფლებას არანაირი კონკრეტული ნაბიჯი არ გადაუდგამს ამ მიმართულებით. მინიმალური სტანდარტების არსებობა ყველა საწარმოში, ინსპექტირების მექანიზმის მიღება და პრევენცია, რომ დამსაქმებელმა იცოდეს, თუ ის დაარღვევს კონკრეტულ წესებს, ის დაისჯება“, - განაცხადა ნანუაშვილმა.

ანა მებურიშვილი