საზოგადოება

სახალხო დამცველის აპარატი ბექა რუსიას საქმეს შეისწავლის

სახალხო დამცველის აპარატი წალენჯიხის მუნიციპალიტეტის სოფელ მუჟავაში ცეცხლსასროლი იარაღით მიყენებული ჭრილობის შედეგად დაღუპული წვევამდელის ბექა რუსიას საქმეს შეისწავლის.

„ჩვენ გვაქვს დეპარტამენტი სახალხო დამცველის ოფისში, რომელიც სპეციალურად სწავლობს სამხედრო ნაწილში ჩადენილ ადამიანის უფლებათა დარღვევის ფაქტებს. შესაბამისად, ეს ინცინდენტიც, რა თქმა უნდა, ჩვენი ყურადღების ქვეშ მოექცა და ვაპირებთ, რომ შევისწავლოთ და გამოვავლინოთ გარემოებები აღნიშნული ინცინდენტის გარშემო“, - თქვა სახალხო დამცველმა, ნინო ლომჯარიამ.

შსს-ის განსაკუთრებული დავალებათა დეპარტამენტის წვევამდელი ბექა რუსია 2017 წლის 26 ოქტომბერს წალენჯიხის მუნიციპალიტეტის სოფელ მუჟავაში, ერთ-ერთ საგუშაგოზე დაიღუპა. რუსიამ გარდაცვალებამდე ცოტა ხნით ადრე ტელეფონი ბებიას გაუგზავნა და მისი შენახვა სთხოვა. როგორც მოგვიანებით გაირკვა, მობილურ ტელეფონში იყო შენახული ვიდეოკადრები, სადაც ჩანს, როგორ უსწორდება ერთ-ერთი მეთაური ჯარისკაცს. ტელეფონში ინახებოდა ფოტოები, რომლებზეც აღბეჭდილი არიან ჯარისკაცები, რომლებსაც მეთაურის ტაბელური იარაღი უჭირავთ ხელში.