საზოგადოება

სახალხო დამცველის სამსახური არაა შექმნილი იმისთვის, რომ ხელისუფლებას გუნდრუკს უკმევდეს - პრეზიდენტი

საქართველოს პრეზიდენტის გიორგი მარგველაშვილის განცხადებით, ომბუდსმენის კრიტიკული შეფასებები აუცილებელია, რათა შემდგომში მოხდეს არსებულ ხარვეზებზე რეაგირება და გამოსწორება.

ამის შესახებ მარგველაშვილმა სასტუმრო „რედისონში“ შრომით ინსპექციასა და შრომით უფლებებზე მიძღვნილ კონფერენციაზე თქვა.

„აქვე მინდა შევეხო იმ განწყობებსაც, რომელსაც მე ვაკვირდებოდი, იმ ადამიანებს, ვისაც მიაჩნია, რომ ომბუდსმენი გუნდრუკს უნდა უკმევდეს ხელისუფლებას, დაკავებული უნდა იყოს შედარებითი ანალიზებით, აღმოაჩენდეს არა პრობლემებს, არამედ ქადაგებდეს, თუ რამდენი კარგი კეთდება, მინდა მათ გასაგონად ვთქვა, რომ ომბუდსმენის სამსახური ამისთვის არ არის შექმნილი. ამისთვის ბევრი საინტერესო ინსტიტუტი არსებობს, ბევრი პოლიტიკოსი მოევლინება საზოგადოებას, ბევრი მოსაუბრე თავია, რომელიც ავლენს დიდებას ძლიერთა ამა ქვეყნისა მიმართ, მაგრამ არა ომბუდსმენი.

ომბუდსმენის ფუნქცია მდგომარეობს იმაში, ომბუდსმენის სამსახურს ხელფასს ვუხდით, რათა აღმოაჩინოს პრობლემები და მოგვცეს მათი ანალიზისა და დაძლევის შესაძლებლობა. თუკი ომბუდსმენი იმის თაობაზე ისაუბრებს, თუ რა არის კარგი გაკეთებული, ასეთ ინსტიტუტს ფასი არ ექნება. არიან ადამიანები, რომლებიც ამას სრულიად უფასოდ აკეთებენ და ეს საქმე შეგვიძლია მათ მივანდოთ”, - განაცხადა პრეზიდენტმა.

ქვეყნის პირველმა პირმა ასევე აღნიშნა სახალხო დამცველის გამოსვლა პარლამენტში. პრეზიდენტის თქმით, გასაანალიზებელია ის საკითხები, რომლებსაც ომბუდსმენი შეეხო თავის ანგარიშში.

ანა მებურიშვილი