საზოგადოება

სახალხო დამცველმა საქართველოში ადამიანის უფლებათა და თავისუფლებათა დაცვის მდგომარეობის შესახებ ანგარიში პარლამენტში შეიტანა

31 მარტს საქართველოს სახალხო დამცველმა უჩა ნანუაშვილმა „სახალხო დამცველის შესახებ“ ორგანული კანონის თანახმად, საქართველოს პარლამენტში 2016 წელს ქვეყანაში ადამიანის უფლებათა და თავისუფლებათა დაცვის მდგომარეობის შესახებ წლიური ანგარიში შეიტანა.

ანგარიში მიმოიხილავს ადამიანის უფლებათა ფართო სპექტრს, განსაკუთრებულ ყურადღებას ამახვილებს საანგარიშო პერიოდში გამოვლენილ დადებით და უარყოფით ტენდენციებზე. ამასთან, თავს უყრის სახალხო დამცველის მიერ ხელისუფლების სხვადასხვა შტოს მისამართით შემუშავებულ ძირითად, უმნიშვნელოვანეს რეკომენდაციებს.

30 თავისგან შემდგარ, 843 გვერდიან ანგარიშში საუბარია პენიტენციურ სისტემაში განხორციელებულ პოზიტიურ ცვლილებებსა და ჯერ კიდევ არსებულ პრობლემებზე, პოლიციის მხრიდან არასათანადო მოპყრობის ფაქტებსა და მათი გამოძიების არასრულფასოვნებაზე, სამართლიანი სასამართლოს უფლების დარღვევის შემთხვევებზე, პირადი და ოჯახური ცხოვრების ხელყოფის ფაქტებზე პროკურატურის უმოქმედობაზე. განხილულია სხვადასხვა უმცირესობათა მიმართ ტოლერანტობისა და თანასწორუფლებიანობის კუთხით გამოვლენილი სისტემური პრობლემები, საკუთრების, შრომის თუ კულტურული მემკვიდრეობის დაცვის უფლების თვალსაზრისით არსებული საკანონმდებლო ხარვეზები. ქალთა, ბავშვთა, შეზღუდული შესაძლებლობის პირთა და სხვა მოწყვლადი ჯგუფების დაუცველობა ძალადობის, სიღარიბის, ცხოვრების არასათანადო დონის, ქუჩაში ცხოვრებისა და მუშაობისგან. კონფლიქტურ რეგიონებში, საოკუპაციო ხაზის მიმდებარე სოფლებში მცხოვრები მოსახლეობის, ეკომიგრანტების, სამხრეთ საქართველოდან იძულებით გადასახლებულ პირთა რეპატრიანტთა და წვევამდელთა სხვადასხვა საჭიროებები.