პოლიტიკა
სახელისუფლებო პარტიის მხარდამჭერების თმენის ვალდებულება გაცილებით მაღალია, ვიდრე სხვა პოლიტიკური ძალების მხარდამჭერებისა-გიორგი კვირიკაშვილი
საქართველოს პრემიერ–მინისტრი გიორგი კვირიკაშვილი მთავრობის დღევანდელი სხდომის დაწყებისას კიდევ ერთხელ გამოეხმაურა სოფელ კორცხელის საარჩევნო უბანზე მომხდარ ინციდენტს და სახელისუფლებო ძალის მხარდამჭერებს მოუწოდა, არ ჩაერთონ არანაირ დაპირისპირებაში.
გიორგი კვირიკაშვილის განცხადებით, ხელისუფლების წარმომადგენლებს და სამოქალაქო პირებს, რომლებიც სახელისუფლებო პარტიის მხარდამჭერები არიან, გაცილებით მაღალი თმენის ვალდებულება ეკისრებათ, ვიდრე სხვა პოლიტიკური ძალების მხარდამჭერებს.
„ეს არის მიუღებელი და სამწუხარო ინციდენტი, რომელიც მოხდა. მიმდინარეობს გამოძიება და მინდა უპირველესად ჩვენი მხარდამჭერების გასაგონად ვთქვა, რომ ეს არ არის ჩვენი სტილი, ჩვენ არ ვაპირებთ არჩევნების ამ სტილში ჩატარებას. ჩვენი მიზანია, უზრუნველვყოთ ძალადობისგან თავისუფალი საარჩევნო უბანი, რათა მოქალაქეებმა შეძლონ თავისუფალ გარემოში, კონფრონტაციისა და ასეთი ტიპის დაპირისპირების გარეშე, საკუთარი ნების გამოხატვა. ეს არის ჩვენი სახელმწიფოებრიობის მშენებლობისთვის უმნიშვნელოვანესი და მინდა ყველა ჩვენს მხარდამჭერს ვუთხრა, რომ ხელისუფლების წარმომადგენლებს გვეკისრება თმენის უდიდესი პასუხისმგებლობა. ასევე, სამოქალაქო პირებს, რომელიც არ არიან ხელისუფლების წარმომადგენლები, მაგრამ არიან სახელისუფლებო პოლიტიკური ძალის მხარდამჭერები, ზუსტად ასეთივე თმენის ვალდებულება ეკისრებათ. მათი თმენის ვალდებულება გაცილებით უფრო მაღალია, ვიდრე იმ სხვა პოლიტიკური ძალების მხარდამჭერებისა, რომლებმაც შეიძლება ხშირ შემთხვევაში პროვოკაციულადაც იმოქმედონ,“–განაცხადა პრემიერმა მთავრობის სხდომის დაწყების წინ.
მარი ნამგალაძე