პოლიტიკა

ღარიბაშვილმა გვაცნობა, რომ თითქოს, ბორჯომი დაუბრუნა ხალხს და მოგიყვებით რა გარიგებასთან გვაქვს საქმე - ელენე ხოშტარია

ვაგრძელებ ინფორმაციის გავრცელებას საქართველოს ოლიგარქიული მმართველობის ქვეშ მყოფი ადამიანების შესახებ. ამჯერად უკვე სახელმწიფოს მხრიდან, უკრაინის ომის დროს რუსეთში სანქცირებულ პირებთან კავშირების შესახებ, - ამის შესახებ პარტია "დროას" ლიდერმა, ელენე ხოშტარიამ განაცხადა.

„დღეს მინდა, მოგიყვეთ ისტორია „“ბორჯომის“ შესახებ, რომელზეც ირაკლი ღარიბაშვილმა გვაცნობა, რომ თითქოს „ბორჯომი” დაუბრუნა ხალხს. მოგიყვებით რა გარიგებასთან გვაქვს საქმე. ასევე შეგახსენებთ, რომ „იმედის“ პროპაგანდისტი ირაკლი რუხაძე არის ასევე “ბორჯომის“ სამეთვალყურეო საბჭოს წევრი ანუ ისიც მონაწილეობს ამ გარიგებაშიც, რომელშიც პრაქტიკულად ღიად მონაწილეობს სახელმწიფო.

კომპანია “ბორჯომის“ 57,72%-ის მფლობელი იყო მიხეილ ფრიდმანი, რომელიც უკრაინაში ომის დაწყების შემდეგ, დაასანქცირეს, შესაბამისად, საქართველოს სახელმწიფოსგან ამაზე მოთხოვნილი იყო რეაგირება. როგორც ნორმალურ ქვეყნებში ხდება, მსგავსი სანქცირებული პირი თეთრს არ უნდა იღებდეს მსგავსი ბიზნესიდან, ამის ნაცვლად, სახელმწიფომ მისგან შეისყიდა 7, 73 % და 49, 89% დაუტოვა ფრიდმანს.

ფაქტობრივად, სახელმწიფო შევიდა გარიგებაში სანქცირებულ პირთან და დღემდე მიხეილ ფრიდმანს შესდის “ბორჯომიდან02“ უდიდესი შემოსავალი. ეს ინფორმაცია არის საჯარო, ამაზე საუბრობდა მთავრობის სხდომაზე ერთ-ერთი მინისტრი და ინფორმაცია ამის შესახებ ქართულ პრესაშიც გავრცელდა. რა თქმა უნდა, ამ საკითხს სჭირდება კარგად შესწავლა. ჩვენ ყველაფერს გადავცემთ ჩვენს პარტნიორებს იმიტომ, რომ მაშინ, როდესაც ამ ფულით ფინანსდება სისხლიანი კამპანია, ადამიანების ხოცვა უკრაინაში, სანქცირებული პირი, ფრიდმანი ქართული “ბორჯომიდან“ ფულს არ უნდა იღებდეს. სხვათა შორის, მას 2013 წელს ბადრი პატარკაციშვილის ოჯახისგან გადაეცა ეს წილი, საკონტროლო პაკეტი.

საინტერესოა, რატომ შეისყიდა სახელმწიფომ წილის ზუსტად იმდენი პროცენტი, რომ საკონტროლო პაკეტს ჩამოსცილებოდა ფრიდმანი. ეს ჰგავს სანქციებიდან თავის არიდების გარკვეულ მცდელობას, რომ ფორმალურად, ერთადერთი მფლობელი არ იყოს მიხეილ ფრიდმანი. თუმცა, ის რჩება უდიდეს მეწილედ და დღემდე“ბორჯომისგან“ ყველაზე მეტი ფული მას შესდის,“ - განაცხადა ელენე ხოშტარიამ.