პოლიტიკა
საკონსტიტუციო კომისიაში შეთანხმდნენ ორ საკითხზე- ვახტანგ ხმალაძე
ექსპერტ ვახტანგ ხმალაძის განცხადებით, საკონსტიტუციო კომისიაში შეთანხმდნენ ორ საკითხზე: პარლამენტის მიერ მთავრობის უნდობლობის პროცედურასა და მთავრობის მიერ საკანონმდებლო ორგანოსთვის ნდობის გამოცხადებაზე. მისი აზრით, ესაა „ერთ-ერთი წარმატებული შეთანხმება“.
იდეის თანახმად, პარლამენტის დეპუტატების კონსტიტუციით განსაზღვრული რაოდენობა, რომელიც მთავრობას უნდობლობას გამოუცხადებს, უნდა წარუდგინოს პარლამენტს პრემიერ-მინისტრის კანდიდატურა, მან კი - სავარაუდო მინისტრები.
„თუ პარლამენტის წევრთა კონსტიტუციურად განსაზრღვრული რაოდენობა მიიჩნევს, რომ უნდობლობა უნდა გამოუცხადოს მთავრობას, ის სვამს საკითხს უნდობლობის გამოცხადების თაობაზე. იმავე დროს ის ასახელებს ახალი პრემიერ-მინისტრის კანდიდატურას. ამ პრემიერ-მინისტრობის კანდიდატმა კონსტიტუციით განსაზღვრულ ვადაში, რომელიც, თუ სწორად მახსოვს, სამ კვირას არ აღემატება, უნდა წარუდგინოს პარლამენტს მთავრობის შემადგენლობა და პარლამენტმა კენჭი უნდა უყაროს ახალი მთავრობისთვის ნდობის გამოცხადებას. თუ ნდობა არ გამოუცხადა, რჩება ძველი მთავრობა. ვინც მოინდობა უნდობლობის გამოცხადება, 6 თვის განმავლობაში ამ საკითხს ვეღარ დასვამს. თუკი პარლამენტმა ნდობა გამოუცხადა ახალ მთავრობას უმრავლესობით, მაშინ მთავრობა გადამდგარად ითვლება და მოვა ახალი მთავრობა, ანუ, აი, ეს პოლიტიკური კრიზისის პერიოდი არის ხანმოკლე. მე რა ვადაც გითხრით, ესაა მაქსიმალური ვადა და ეს შეიძლება, უფრო ადრე დამთავრდეს“, - განაცხადა ხმალაძემ დღევანდელ პრესკონფერენციაზე.
ხმალაძე აღნიშნავს, რომ 2010 წელს კონსტიტუციაში შეტანილი ცვლილების მიხედვით, მთავრობისთვის უნდობლობის გამოცხადების პროცედურით „პარლამენტს შეუძლია მთავრობის შანტაჟირება“. საკონსტიტუციო კომისიის წევრის თქმით, ამ შეთანხმებით ეს გასწორებულია.
ხმალაძის განცხადებით, ამ მოდელის შეტანა პარლამენტში სამართლიანი იქნება, თუკი საპარლამენტო არჩევნები სრულიად გადავა პროპორციულ წესზე.
„ეს ყველაფერი იქნება სამართლიანი და ოპტიმალური, თუ პარლამენტის არჩევის წესი უზრუნველყოფს პროპროციულ წარმომადგენლობას. ანუ, ის, ვისაც მხარს უჭერს 20%, მან უნდა მიიღოს მანდატების 20%“, - თქვა ხმალაძემ.
მან ასევე განაცხადა, რომ მთავრობასაც ექნება ნდობის საკითხის გამოცხადების შესაძლებლობა.
ანა მებურიშვილი