პოლიტიკა
საკონსტიტუციო კომისიის ფორმატი უნდა ყოფილიყო ღია - გიორგი მარგველაშვილი
საქართველოს პრეზიდენტის გიორგი მარგველაშვილის განცხადებით, საკონსტიტუციო კომისიის ფორმატი უნდა ყოფილიყო ღია, რათა მომხდარიყო საზოგადოების მაქსიმალური ჩართულობა. ამის შესახებ მან ილიას უნივერსიტეტის სტუდენტებთან შეხვედრისას თქვა.
„მე ვთავაზობდი, რომ ვყოფილიყავით სამი თანათავმჯდომარე. კომიკურია აზრი იმის შესახებ, რომ მე თანათავმჯდომარის თანამდებობა მინდოდა. კომისიის ფორმატი უნდა ყოფილიყო ღია. ასეთი იყო ჩემი მოსაზრება. აქ არ არის საუბარი იმაზე, რომ შესაცვლელი იქნებოდა ერთი მუხლი. მე ვფიქრობდი, რომ კონსტიტუციაში ცვლილებების შესახებ უნდა გვეკითხა საზოგადოებისთვის, თუნდაც პრეზიდენტის არჩევის წესსა და ასე შემდეგ“,- განაცხადა პრეზიდენტმა.
პრეზიდენტის თქმით, კომისია გარკვეულწილად ჩაიკეტა საზოგადოებისგან და ეს გახდა ერთ-ერთი მიზეზი, რის გამოც მან წამოიწყო კამპანია „კონსტიტუცია ყველასია“.
სტუდენტის კითხვაზე, რატომ არ ტარდება პრეზიდენტის არჩევის წესთან დაკავშირებით რეფერენდუმი, მარგველაშვილმა უპასუხა, რომ მან არჩია საყოველთაო მსჯელობა.
„რა უფრო მნიშვნელოვანია, რეფერენდუმი, პლებისციტი თუ პოლიტიკური აქტივობის სხვა ფორმები? რეფერენდუმის წესს აქვს პრობლემა ჩვენს ქვეყანაში, მაგრამ თუნდაც პლებისციტი რეალური და ლეგიტიმური ბერკეტია. მაგრამ რა უფრო ფასეულია - შეხვედრა და საუბარი თუ კონსტიტუციაში სწორად ჩაწერილი კითხვა?“, - უპასუხა პრეზიდენტმა.
ანა მებურიშვილი