საზოგადოება

საკრებულოს წევრებსა და „ბავშვთა სამყაროს“ მოვაჭრეებს შორის მოლაპარაკებები 14 მარტს გაიმართება

დასრულდა საკრებულოს თავმჯდომარისა და „ქართული ოცნების“ წევრების შეხვედრა „ბავშვთა სამყაროში“ ხანძრის შედეგად დაზარალებულ მოვაჭრეებთან. მათ შორის მოლაპარაკება მას შემდეგ გაიმართა, რაც მოვაჭრეებმა საკრებულოს წინ აქცია გამართეს კომპენსაციების გაცემის მოთხოვნით.

ერთ-ერთი მოვაჭრის, მანანა ლოხიშვილის განცხადებით, რამე კონკრეტული შედეგები შეხვედრას არ მოჰყოლია. მან აღნიშნა, რომ დაზარალებული მოვაჭრეები საკრებულოს დეპუტატებს 14 მარტს შეხვდებიან.

„რომ გითხრათ, რომ კონკრეტულად ჩვენ შევთანხმდით და რაღაც შედეგს მივაღწიეთ, ეს ტყუილი იქნება, მაგრამ, ჩვენ თითქმის თვე-ნახევარი ველოდეთ, ამიტომ სამი-ოთხი დღე აღარაფერს წყვეტს. ჩვენ დაველოდებით სამშაბათს. უნდა შედგეს ახალი სიები, ყველაფერი დეტალებში უნდა იყოს აღწერილი და ამ სიების მიხედვით, არ ვიცი, რაზე შეჯერდებიან, რას დაგვპირდებიან, ლაპარაკი აქ იყო პირველად კომპენსაციაზე“, - განაცხადა ლოხიშვილმა.

შეგახსენებთ, რომ სავაჭრო ცენტრ „ბავშვთა სამყაროში“ ხანძარი 30 იანვარს გაჩნდა, რომლის შედეგად 1000-ზე მეტი მოვაჭრე დაზარალდა. გამოძიება ხანძრის გამომწვევ მიზეზებზე ამ დრომდე მიმდინარეობს.

ანა მებურიშვილი