პოლიტიკა

საკუთარ თავს ხომ არ დაიჭერს? ფარცხალაძეს, ჩხარტიშვილს, საბანკო მაფიას რამეს უზამს? ხრიკები დაგიძველდა, ბორის! - მიხეილ სააკაშვილი ივანიშვილს

საქართველოს ყოფილი პრეზიდენტი მიხეილ სააკაშვილი „ქართული ოცნების“ თავმჯდომარის, ბიძინა ივანიშვილის დღევანდელ განცხადებას ვიდეომიმართვით გამოეხმაურა, რომელიც სოციალურ ქსელში გამოაქვეყნა.

„ბიძინამ, აქამდე კი გატყუებდითო, მაგრამ ეხლა ძალიან მჭირდება, რომ დამიჯეროთო...

ივანიშვილს დღეს ისეთი სახე ჰქონდა,ქურდს ფაქტზე რომ წაასწრებენ და იხვეწება ამ ერთხელ მაპატიეთო...თან კარგად მოვიქცევიო, თან კრიმინალური "ავტორიტეტები" მთელს ქვეყანაში ხალხს დაატერორებენ და ამაზე თვალი დახუჭეთო...

ხრიკები დაგიძველდა, ბორის!“, - წერია სააკაშვილის ფეისბუკპოსტში, რომელიც მიბმულია ვიდეომიმართვას.

მისი თქმით, ივანიშვილი თავისი დაპირების მიუხედავად, ერთ წელიწადში არ აპირებს არაფრის გაკეთებას.

„ამის გამოსწორება არ შეიძლება, ამ კაცმა ბოლო 2 წელიწადში თქვენ ჯიბიდან ამოგაცალათ 3 მილიარდი ლარი. გამოსწორდება კი არა, თავის ქურდ დეიდაშვილ უჩას დაიჭერს? საკუთარ თავს ხომ არ დაიჭერს? ფარცხალაძეს რამეს უზამს? ჩხარტიშვილს რამეს უზამს? საბანკო მაფიას - ხაზარაძესა და ვიღაცებს რამეს უზამს? რა თქმა უნდა, არაფერს. ის ისევ მოგადგებათ თქვენ. ახლა თუ გაუშვით, მას არა მხოლოდ არაფრის შესრულება არ უნდა, მას აქვს ძალიან მზაკვრული გეგმები, ძალიან საშიში ქართველი ერის მომავალთან და თითოეულ თქვენგანთან დაკავშირებით. ახლა ისაა, როგორც არასდროს, სუსტი, ჩოქბჯენში, და არ უნდა მივცეთ იქიდან წამოდგომის საშუალება“, -განაცხადა სააკაშვილმა ვიდეომიმართვაში.