პოლიტიკა

სამართალდამცავმა უწყებებმა მაჩალიკაშვილების ოჯახს მიმდინარე გამოძიებასთან დაკავშირებით მაქსიმალური ინფორმაცია უნდა მიაწოდონ - ნინო ლომჯარია

სახალხო დამცველის, ნინო ლომჯარიას განცხადებით, სამართალდამცავმა უწყებებმა მაჩალიკაშვილების ოჯახს თემირლან მაჩალიკაშვილის საქმეზე, მიმდინარე გამოძიებასთან დაკავშირებით, მაქსიმალური ინფორმაცია უნდა მიაწოდონ.

ომბუდსმენის თქმით, საქმის გასაიდუმლოებული ნაწილი მაჩალიკაშვილების ოჯახში მეტ კითხვას აჩენს.

„ყველას აქვს უფლება, თავისი პროტესტი მშვიდობიანი და კანონიერი ფორმით გამოხატოს. რაც შეეხება ამ კონკრეტულ შემთხვევას, რა თქმა უნდა, კითხვები გარდაცვალების გარემოებებთან დაკავშირებით ჩვენც გვაქვს. ჩემი პოზიცია იქნებოდა, სამართალდამცავმა უწყებებმა მაჩალიკაშვილის ოჯახის წევრებს მიმდინარე გამოძიებასთან დაკავშირებით მაქსიმალური ინფორმაცია უნდა მიაწოდონ. სასურველი იქნება, რომ პროკურატურამაც და სახელმწიფო უსაფრთხოების სამსახურმაც რამდენადაც შესაძლებელია, ადვოკატებსა და ოჯახის წევრებს მიაწოდონ ინფორმაცია, თუ რა ეტაპზეა გამოძიება. ეს საიდუმლო და გასაიდუმლოებული ნაწილი ამ საქმის გარშემო ოჯახის წევრებში კიდევ უფრო მეტ კითხვებს იწვევს“, – განაცხადა ლომჯარიამ.

ცნობისთვის, 26 დეკემბერს პანკისის ხეობის სოფელ დუისში ჩატარებული სპეცოპერაციის დროს 19 წლის თემირლან მაჩალიკაშვილი თავის არეში დაჭრეს. ახალგაზრდა მამაკაცი თბილისში გადაიყვანეს, იგეგმებოდა მისი საზღვარგარეთ სამკურნალოდ წაყვანა, თუმცა თემირლან მაჩალიკაშვილი 10 იანვარს დაიღუპა.