საზოგადოება
სამედიცინო და საგანმანათლებლო დაწესებულებების ეზოებში, სპეციალურად მოწყობილ ადგილებში მოწევა შესაძლოა ნებადართული გახდეს
პარლამენტის ჯანდაცვის კომიტეტმა მხარი დაუჭირა, რომ სამედიცინო და საგანმანათლებლო დაწესებულებების ეზოებში, სპეციალურად მოწყობილ ადგილებში, ნებადართული გახდეს მოწევა, - განაცხადა ჯანმრთელობის დაცვისა და სოციალურ საკითხთა კომიტეტის თავმჯდომარემ აკაკი ზოიძემ.
მისი თქმით, რამდენიმე საკითხია ამ კანონში, რომელიც უზრუნველყოფს, რომ ღია სივრცეებში, გარკვეულ პირობებში 1-ელი მაისიდან აკრძალულია მოწევა, ესაა- სამედიცინო და საგანმანათლებლო დაწესებულებების ეზოები.
როგორც აკაკი ზოიძე ამბობს, მსგავს ადგილებში მონიტორინგის მიხედვით, გარკვეული კონფლიქტების მიზეზი ხდება მოწევის აკრძალვა.
მისი თქმით, ამ საკითხზე მომუშავე ორგანიზაციები მათ შორის, "თამბაქოს კონტროლის ალიანსიც" ამბობს, რომ ამ თვალსაზრისით არის პრობლემა.
"კომიტეტმა მხარი დაუჭირა იმას, რომ გარკვეულ ადგილებში, ეზოებში სპეციალურად მოწყობილ ადგილებში დაიშვას მოწევა. სექტემბერში ინიცირებას გავაკეთებთ და იმედია, პარლამენტს დავარწმუნებთ", - განაცხადა აკაკი ზოიძემ.
მისივე თქმით, ეს არ ეხება სკოლებს, იქ მოწევა აკრძალული დარჩება. რაც შეეხება სტადიონებს, სადაც მოწევა 2020 წლიდან უნდა აიკრძალოს, ეს ძალაში იქნება.
დეპუტატმა ასევე თეატრალურ წარმოდგენებში თამბაქოს გამოყენებაზეც ისაუბრა და აღნიშნა, რომ ამ შემთხვევაში რეჟისორის დასაბუთებაა საჭირო.
"რეჟისორმა უნდა დაასაბუთოს, რომ ეს აუცილებელია მხატვრული ჩანაფიქრისთვის", - აღნიშნა აკაკი ზოიძემ.
ნინო ექვთიმიშვილი