საზოგადოება

სამინისტრო ყველაფერს იღონებს, რათა აღარასდროს დავუშვათ მსგავსი ტრაგედია - განათლების მინისტრი

განათლებისა და მეცნიერების მინისტრი მიხეილ ჩხენკელი გამოეხმაურა ხორავას ქუჩაზე დაჭრილი 51-ე სკოლის კიდევ ერთი მოსწავლის გარდაცვალებას. მან მოზარდის ოჯახსა და ახლობლებს მიუსამძიმრა.

მინისტრის მტკიცებით, უწყება ყველაფერს გააკეთებს, რათა არ დაუშვას მსგავსი ფაქტები მომავალში.

„გუშინდელი ტრაგედიის შემდეგ ყველა ჩვენგანს გვაერთიანებდა იმედი, რომ მოხერხდებოდა მძიმედ დაჭრილი მოსწავლის გადარჩენა.

სამწუხაროდ, არაერთი ექიმის თავდაუზოგავი, ოცდაოთხსაათიანი ბრძოლის მიუხედავად, ეს შეუძლებელი აღმოჩნდა. ოჯახმა, მეგობრებმა, მთლიანად საზოგადოებამ კიდევ ერთი ახალგაზრდა ადამიანი დავკარგეთ.

ამ უმძიმეს წუთებში თანადგომას ვუცხადებ გარდაცვლილი მოსწავლის მშობლებსა და ახლობლებს.

სამინისტრო, სხვა სახელმწიფო უწყებებთან და საზოგადოებასთან თანამშრომლობით, ყველაფერს იღონებს, რათა აღარასდროს დავუშვათ მსგავსი ტრაგედია“, - დაწერა ჩხენკელმა ფეისბუკის საკუთარ გვერდზე.

გუშინ ხორავას ქუჩაზე 51-ე სკოლის 2 მოსწავლე დაჭრეს. ერთ-ერთი მათგანი საავადმყოფოში მიყვანამდე გარდაიცვალა, მეორე კი დღეს, რესპუბლიკურ საავადმყოფოში.

ანა მებურიშვილი