უახლესი ამბები
არქივი
საზოგადოება
სამხედრო პოლიციის ბატალიონებიდან სამოქალაქო პირების გათავისუფლებას ლევან იზორია ნატო-ს სტანდარტებით ხსნის
თავდაცვის მინისტრმა ლევან იზორიამ განმარტება გააკეთა სამხედრო პოლიციის ბატალიონებიდან გათავისუფლებულ სამოქალაქო პირების საკითხზე.
როგორც იზორიამ წლის შემაჯამებელ პრესკონფერენციაზე განაცხადა, მათი გათავისუფლება ნატო-ს სტანდარტებიდან გამომდინარე მოხდა.
,,სამოქალაქო პირები დაითხოვეს სამხედრო პოლიციის ბატალიონებიდან. ამის მიზეზი იყო ის, რომ როდესაც ჩვენ ნატო-ს სტანდარტებზე ვსაუბრობთ, ნატო-ს წევრ ქვეყნებში სამხედრო ბატალიონები არის დაკომპლექტებული სამხედრო პირებით და არა სამოქალაქო პერსონებით.’’, - განაცხადა იზორიამ.
რაც შეეხება უწყებაში ვეტერანების შესაძლო შემცირების საკითხს, თავდაცვის მინისტრის თქმით, განიხილება მათი სოფლის მეურნეობის სამინისტროში დასაქმების შესაძლებლობა.
,,ყურადღება გვინდა დავუთმოთ ვეტერანებს, რომლებიც ამ ოპტიმიზაციის ფარგლებში შესაძლოა სამსახური დაკარგონ. მე მქონდა საუბარი ასევე სოფლის მეურნეობის მინისტრთან და მომავალ წელს იგეგმება სწორედ მათთვის გარკვეული ინიციატივების შეთავაზება, რათა მათ ჰქონდეთ უპირატესი უფლება იმისთვის, რომ დასაქმდნენ’’, - აღნიშნა თავდაცვის მინისტრმა.
ნინო ექვთიმიშვილი