საზოგადოება

სამხედრო სავალდებულო სამსახურში გაწვევის აღდგენას პრეზიდენტმა და უშიშროების საბჭომ მხარი დაუჭირა

საქართველოს პრეზიდენტი სამხედრო სავალდებულო სამსახურში გაწვევის აღდგენის არგუმენტად გაზაფხულზე პირადი შემადგენლობის ნაკლებობას ასახელებს.

თემაზე გიორგი მარგველაშვილმა განცხადება საზოგადოებრივი მაუწყებლის ეთერში გააკეთა.

მისი ინფორმაციით, თავდაცვის ყოფილი მინისტრის, თინა ხიდაშელის გადაწყვეტილება უშიშროების საბჭომ არ გაიზიარა და შესაბამისად, თავდაცვის უწყება სამხედრო სავალდებულო სამსახურში წვევამდელებს კვლავ გაიწვევს.

,,2013 წელს მიღებული სტრატეგიული დოკუმენტის თანახმად, რომელიც განსაზღვრავდა ჩვენი შეიარაღებული ძალების განვითარებას, ეს დოკუმენტი მიზნობრივად მიმართული იყო 2016 წელს სრულად პროფესიულ არმიაზე გადასასვლელად. ეს იყო ის დოკუმენტი, რომლითაც ჩვენ ვმუშაობდით, რომლითაც მე ვიმუშავე ფაქტობრივად 4 მინისტრთან - ეს იყო ალასანია, ეს იყო ბატონი მინდია, ეს იყო ქალბატონი თინა და ახლა არის ბატონი ლევან იზორია. ამ დოკუმენტის შემაჯამებელი, ბოლო ფაზა იყო, როდესაც ქალბატონმა თინამ შეაჩერა თავდაცვის უწყებაში საშემოდგომო გაწვევა. დღევანდელი შეფასებით, თუ ასე მომავალშიც გავაგრძელებთ, ჩვენ შეიარაღებულ ძალებს გაუჩნდება პირადი შემადგენლობის სიმცირის პრობლემა, რასაც ბუნებრივია, ჩვენ ვერ დავუშვებდით. ბატონი მინისტრის გადაწყვეტილება, რომ საგაზაფხულო გაწვევა ჩატარდეს ისე, როგორც აქამდე ტარდებოდა ანუ არ გაუქმდეს, როგორც ეს შემოდგომაზე იყო, იქნა მხარდაჭერილი როგორც ჩემ მიერ, ასევე უშიშროების საბჭოს წევრთა უმრავლესობის მიერ’’, - განაცხადა გიორგი მარგველაშვილმა.

ნინო ექვთიმიშვილი