უახლესი ამბები
არქივი
პოლიტიკა
სამხედროები არაფერ შუაში არ არიან... სააკაშვილი გაურიგდა მოწინააღმდეგეებს, რომ ჩააბარებდა ტერიტორიებს - ემზარ კვიციანი
„პატრიოტთა ალიანსის“ წევრის, ემზარ კვიციანის განცხადებით, ჰააგის სასამართლო პროცესზე სამხედრო პირების პასუხისმგებლობის საკითხი არ დადგება. მისი განმარტებით, სამხედროები მხოლოდ ბრძანებას ასრულებენ, ამიტომ პასუხისმგებლობა ბრძანების გამცემს, კერძოდ კი მთავარსარდალს უნდა დაეკისროს, რომელმაც საქართველოს მიერ კონტროლირებადი სოფლები რუსეთს გადასცა.
„უმაღლესი მთავარსარდალია ყველაფერზე პასუხისმგებელი და არაფერ შუაშია სამხედროები, რადგან ისინი ასრულებდნენ ბრძანებას და ვინც გასცა ბრძანება ქვეყნის საზიანოდ, ის აუცილებლად უნდა დაისაჯოს. ზოგიერთი ვითომ ოპოზიციონერი რომ იძახის, შეცდომა მოუვიდაო, სწორედ ეს არის დიდი შეცდომა. სააკაშვილმა შეგნებულად, მის გუნდთან ერთად ჩაიდინა კოლექტიური ღალატი, რათა დამდგარიყო ის შედეგი, რომელიც გვაქვს. სააკაშვილი გაურიგდა მოწინააღმდეგეებს, რომ ჩააბარებდა ტერიტორიებს. რუსეთიდან იყო დიდი მოწადინება, დაგვეკარგა აფხაზეთის დარჩენილი ტერიტორიები, რომელსაც ჩვენ 14 წელი ვიცავდით და ასევე ცხინვალის დარჩენილი სოფლები, რომელიც ავტონომიაში შედიოდა და საქართველო აკონტროლებდა“, - განაცხადა დეპუტატმა.
მისივე თქმით, აუცილებელია „უკანონო ბრძანების“ შესახებ კანონის არსებობა, რადგან სამხედრო პირს ჰქონდეს საშუალება, უარი თქვას უკანონო ბრძანების შესრულებაზე.