ეკონომიკა
საპარტნიორო ფონდს სინგაპურის დელეგაცია ეწვია
საპარტნიორო ფონდში სინგაპურის საქმიანი წრეების წარმომადგენლებთან გაცნობითი ხასიათის შეხვედრა შედგა.
სინგაპურის ოფიციალური დელეგაცია საქართველოში სამუშაო ვიზიტით იმყოფება და ქვეყნის საინვესტიციო პოტენციალს სწავლობს.
საპარტნიორო ფონდში გამართულ შეხვედრას სინგაპურის მხრიდან კომპანია PTO Holdings-ის ჯგუფის ხელმძღვანელი პიტერ ტანი, GREAT AMWEIVAN INSURANCE COMPANY-ის დირექტორი ლინდა ტანი, კომპანია FROTH-ის გენერალური მენეჯერი ლიმ ლი ფინი და სინგაპურის საპატიო კონსული საქართველოში ტან შოუ ი ესწრებოდნენ. ქართული მხრიდან კი შეხვედრას ფონდის აღმასრულებელი დირექტორის მოადგილე ნათია თურნავა და საინვესტიციო დეპარტამენტის დირექტორის მოადგილე გიორგი დანელია დაესწრნენ.
როგორც მედიანიუსს საპარტნიორო ფონდიდან აცნობეს, ფონდის მენეჯმენტმა სინგაპურის ოფიციალური დელეგაციის წევრებს ფონდის მანდატი, ფუნქცია, პრიორიტეტები, განხორციელებული და მიმდინარე პროექტები გააცნო. ქართულმა მხარემ დელეგაციის წევრებს საქართველოს საინვესტიციო შესაძლებლობებისა და ბიზნეს გარემოს შესახებ ინფორმაცია მიაწოდა. აზიელი ინვესტორები საქართველოში ენერგეტიკის, დაზღვევის, მშენებლობისა და ტურიზმის სფეროებით დაინტერესდნენ. ფონდში გამართულ შეხვედრაზე მხარეებმა სამომავლო თანამშრომლობის პერსპექტივებზე იმსჯელეს.
საპარტნიორო ფონდის ინფორმაციით, PTO Holdings -ი არის სინგაპურში უმსხვილესი კონგლომერატი, რომელიც ბიზნესებს დაფინანსებისა და დაზღვევის ალტერნატიურ სერვისებს სთავაზობს და ათობით კომპანიას აერთიანებს. სინგაპურის დელეგაცია, რომელსაც PTO Holdings -ის ჯგუფის მმართველი პიტერ ტანი ხელმძღვანელობს საქართველოს მთავრობისა და საქმიანი წრეების წარმომადგენლებს ხვდება.