ეკონომიკა

საპენსიო რეფორმა დაიწყება მომავალი წლის მესამე კვარტლიდან - გიორგი გახარია

ეკონომიკისა და მდგრადი განვითარების მინისტრის, გიორგი გახარიას განცხადებით, დაგროვებითი საპენსიო რეფორმის ჩატარებამდე მისი საჯარო განხილვა უნდა დაიწყოს. მინისტრის ვარაუდით, საპენსიო რეფორმა დაიწყება 2018 წლის მესამე კვარტალში.

„უნდა მოხდეს ჯერ საპენსიო რეფორმის ფართომასშტაბიანი საჯარო განხილვები, რომლის პირველი ეტაპი უკვე დაწყებულია. შემდეგ ეს კანონმდებლობა უნდა მოიწონოს მთავრობამ და შემდეგ უნდა შევიდეს პარლამენტში. ეს ყველაფერი მოხდება წლის ბოლომდე. შესაბამისად, საპენსიო რეფორმა დაიწყება მომავალი წლის მესამე კვარტლიდან“, -თქვა გახარიამ.

დაგროვებითი საპენსიო რეფორმა ეფუძნება 2%+2%+2%-ის მოდელს, რაც ნიშნავს, რომ ყოველთვიურად დასაქმებული ხელფასის 2%-ს პერსონალურ საპენსიო ანგარიშზე რიცხავს, კიდევ 2%-ს დამსაქმებელი უმატებს, ხოლო დამატებით 2%-ს - სახელმწიფო. კერძო პენსიის რაოდენობა იქნება განსაზღვრული ფონდში განხორციელებული შენატანების, მუშაობის ხანგრძლივობისა და ფონდის ამონაგების მიხედვით.

როგორც გახარიამ აღნიშნა, კერძო საპენსიო ფონდში ყოველთვიურად თანხის ჩარიცხვა საზოგადოების კონკრეტული სეგმენტისთვის სავალდებულო იქნება, თუმცა მინისტრს არ დაუკონკრეტებია, ვის გულისხმობს.

„მოქალაქეების გარკვეული სეგმენტისთვის ეს არის სავალდებულო. გლობალურად რომ შევხედოთ, გამოდის, რომ არის ნაწილობრივ სავალდებულო“, -აღნიშნა გახარიამ.

ანა მებურიშვილი