საზოგადოება

საპენსიო რეფორმაა საჭირო, რადგან სულ უფრო რთულია პენსიონერების ფინანსური მოთხოვნილებების უზრუნველყოფა - დავით სერგეენკო

„პენსიების სისტემა საჭიროებს რეფორმას“, - ასე უპასუხა ჯანდაცვისა და სოციალური დაცვის მინისტრმა დავით სერგეენკომ 2018 წლისთვის დაგეგმილი საპენსიო რეფორმის შესახებ დასმულ შეკითხვას.

სერგეენკოს განმარტებით, წლიდან წლამდე სახელმწიფოსთვის სულ უფრო რთული ხდება პენსიონერების მოთხოვნილებების უზრუნველყოფა, რის გამოც გახდა საჭირო სისტემური ცვლილებები.

„ჯანდაცვის სამინისტრო ამ პროექტის შემუშავებაში მონაწილეობას იღებდა, თუმცა წამყვანი უწყება იყო და რჩება ეკონომიკის სამინისტრო. პენსიების სისტემა, რა თქმა უნდა, საჭიროებს რეფორმას, რადგან არსებული სახით სულ უფრო რთული და რთულია ასაკით პენსიონერების ფინანსური მოთხოვნილებების უზრუნველყოფა. წარმოდგენილ პროექტზე მუშაობა მინიმუმ სამი წელი გრძელდებოდა. მასში არა მარტო ეკონომიკისა და ჯანდაცვის სამინისტრო, არამედ ამ დარგის საუკეთესო სპეციალისტები იღებდნენ მონაწილეობას. ჩვენი პოზიცია არის ის, რომ ეს არის სკურპულოზურად გათვლილი პროგრამა, რომელსაც აუცილებლად პოზიტიური შედეგები უნდა ჰქონდეს. ამ პროგრამის მიმდინარეობის პერიოდში შეიძლება აღმოჩნდეს გარკვეული ხარვეზები, რომელიც დაექვემდებარება გამოსწორებას“, - განაცხადა სერგეენკომ.

კერძო დაგროვებითი საპენსიო რეფორმის პრეზენტაცია 31 ოქტომბერს მოხდა. ის ეხება დასაქმებულებისა და თვითდასაქმებულთა შემოსავალს. მათი ნაწილი ვალდებული იქნება, თავისი ხელფასიდან გარკვეული პროცენტი გამოჰყონ საპენსიო ფონდში გადასარიცხად.

პენსიისთვის საჭირო თანხის გამოყოფა 2%+2%+2%-ის სქემით მოხდება. კერძოდ, 2%-ს გამოჰყოფს დამსაქმებელი, 2%-ს დასაქმებული და 2%-ს სახელმწიფო. ეს კონტრიბუცია გათავისუფლებული იქნება საშემოსავლო გადასახადისაგან.

ანა მებურიშვილი