უახლესი ამბები
არქივი
საზოგადოება
საქართველო ევროკავშირის განათლების პროგრამაში მონაწილეობას მიიღებს
განათლების, მეცნიერებისა და კულტურის კომიტეტის სხდომაზე „საქართველოსა და ევროკავშირს შორის ევროკავშირის პროგრამა ჰორიზონტი 2020 - კვლევისა და ინოვაციის ჩარჩო პროგრამაში (2014-2020) საქართველოს მონაწილეობის შესახებ“ შეთანხმება და მისი თანმდევი კანონპროექტი „საქართველოს ადმინისტრაციულ საპროცესო კოდექსში ცვლილების შეტანის შესახებ“ მესამე მოსმენით განიხილა.
მომხსენებლის, განათლებისა და მეცნიერების სამინისტროს სამართლებრივი უზრუნველყოფის დეპარტამენტის უფროსის, დავით ლომინაშვილის განმარტებით, 2016 წლის 29 აპრილს, საქართველოს განათლებისა და მეცნიერების სამინისტროს მიერ ევროკომისიასთან გაფორმებული ხელშეკრულების თანახმად, საქართველოს ბენეფიციარებს, ევროკავშირის ქვეყნების მსგავსად, შესაძლებლობა ექნებათ, ევროკომისიის მიერ, ამ პროგრამის ფარგლებში გამოცხადებულ საგრანტო კონკურსებში მიიღონ მონაწილეობა. პროგრამის მიზანი მეცნიერების განვითარებაა. მთლიანი პროექტის ღირებულება 77 მილიარდ ევროს შეადგენს და 7 წელზეა გათვლილი.
სარატიფიკაციოდ წარმოდგენილი შეთანხმების თანმდევი კანონპროექტის-„საქართველოს ადმინისტრაციულ საპროცესო კოდექსში ცვლილების შეტანის შესახებ“ თანახმად, ორგანოს, რომელმაც, ევროკომისიის მოთხოვნით, საქართველოში აღსასრულებლად უნდა მიაქციოს ევროკომისიის გადაწყვეტილება, განსაზღვრავს საქართველოს მთავრობა. ამასთან, ადმინისტრაციულ საპროცესო კოდექსს ემატება სპეციალური ადმინისტრაციული სამართალწარმოების თავი „საქართველოსა და ევროკავშირს შორის ევროკავშირის პროგრამა ჰორიზონტი -2020-კვლევისა და ინოვაციის ჩარჩო პროგრამაში (2014-2020) საქართველოს მონაწილეობის შესახებ“ შეთანხმების ფარგლებში, ევროკომისიის გადაწყვეტილების საფუძველზე, იურიდიული პირისათვის ფულადი ვალდებულებების დაკისრებასთან დაკავშირებით. ასევე, განისაზღვრება აღნიშნულ საქმეზე მოსამართლის დადგენილების გაცემის, მისი გასაჩივრებისა და გაუქმების წესები.
დავით ლომინაშვილმა დეპუტატების შეკითხვებსაც უპასუხა. კომიტეტმა შეთანხმების რატიფიცირებას და მის თანმდევ კანონპროექტს მხარი დაუჭირა.