პოლიტიკა

საქართველომ არ უნდა დაუშვას მუსტაფა ემრე ჩაბუქის ექსტრადირება თურქეთში - რებეკა ჰარმსი

ევროპარლამენტარმა რებეკა ჰარმსა დემირელის კოლეჯის ყოფილი მენეჯერი, მუსტაფა ემრე ჩაბუქი მოინახულა სასჯელაღსრულების მე-8 დაწესებულებაში. შეხვედრა 2 საათს გაგრძელდა.

ჰარმსმა მოუწოდა ხელისუფლებას, არ დაუშვას ჩაბუქის ექსტრადიცია თურქეთში.

„ეს იყო ჩემი მეორე ვიზიტი მუსტაფა ემრე ჩაბუქთან და შეწუხებული ვარ, რომ ის ამ დრომდე საპატიმროშია. საქართველომ არ უნდა დაუშვას მისი ექსტრადირება თურქეთში და მოვუწოდებ სასამართლოს, არ მიიღოს გადაწყვეტილება, რომელიც ადამიანის უფლებებს ეწინააღმდეგება. მუსტაფა ემრე ჩაბუქი 15 წელია საქართველოშია და პედაგოგად მუშაობს, არ მჯერა არანაირი ბრალდებისა და მტკიცებულების, რომელიც თურქულმა მხარემ მოიპოვა“, -განაცხადა ევროპარლამენტარმა.

რებეკა ჰარმსმა მუსტაფა ემრე ჩაბუქი პირველად საქართველოში ვიზიტისას, ივლისში მოინახულა.

ჩაბუქი 24 მაისს დააკავეს თურქეთის მხარის მოთხოვნით, რომელიც ამტკიცებს, რომ ჩაბუქი ტერორისტული ორგანიზაციის საქმიანობაში იყო ჩართული. დაკავებულსა და მის ოჯახს საქართველოს დევნილთა სამინისტრომ ლტოლვილთა სტატუსსზე უარი უთხრა.

ჩაბუქის ექსტრადირების საქმეზე სასამართლო განხილვა 19 თებერვალს გაიმართება. დემირელის კოლეჯის ყოფილ მენეჯერს წინსაექსტრადაციო პატიმრობის დრო საქართველოს საპატიმროში 24 თებერვალს უმთავრდება.

ანა მებურიშვილი