პოლიტიკა
საქართველომ ექვსი წლის განმავლობაში პირწმინდად მოუგო რუსეთს არაღიარების პოლიტიკა - გიორგი მარგველაშვილი
საქართველომ ექვსი წლის განმავლობაში პირწმინდად მოუგო რუსეთს არაღიარების პოლიტიკა, - ასეთი კომენტარი გააკეთა საქართველოს პრეზიდენტმა, გიორგი მარგველაშვილმა აშშ-ის წარმომადგენელთა პალატის საკანონმდებლო აქტზე.
როგორც ქვეყნის პირველმა პირმა აღნიშნა, ეს არის ქართული დოპლომატიის გამარჯვება და აშშ-ში საქართველოს ელჩის წარმატებული მუშაობის შედეგი.
„ განსაკუთრებული მადლობა ეკუთვნით ჩვენს მეგობრებს დასავლეთში. ასეთი კანონპროექტის განხილვა ამერიკის შეერთებულ შტატებში არის საქართველოს ახალი ელჩის წარმატებული მუშაობის შედეგიც. ჩვენ გვეუბნებიან, რომ მიიღეთ ის რეალობა, რაც არის, მაგრამ საქართველო არასდროს შეეგუება ოკუპირებულ ტერიტორიებს. დღეს იქნება, თუ ხვალ, ჩვენს სამშობლოს გავაერთიანებთ და არ გატყდება ჩვენი სული. დარწმუნებული ვარ, ამ ბრძოლაში ჩვენ გავიმარჯვებთ“,- განაცხადა გიორგი მარგველაშვილმა.
ცნობისათვის, აშშ-ს წარმომადგენელთა პალატამ სპეცსამსახურებისთვის 2017 წლის ბიუჯეტთან ერთად საკანონმდებლო აქტი დაამტკიცა, რომელიც კრემლის ფარული გავლენის შემცირებას ითვალისწინებს როგორც შეერთებულ შტატებში, ასევე ევროპაში. აღნიშნული კანონის ერთ-ერთი თავი უკრაინის და საქართველოს ტერიტორიული მთლიანობის დასაცავად ზომების მიღებას ითვალისწინებს. კერძოდ, შეერთებული შტატების ადმინისტრაციას ეკრძალება რაიმე სახის დახმარების გაწევა ქვეყნებისთვის, რომლებიც საქართველოს რეგიონების აფხაზეთისა და ე.წ. სამხრეთ ოსეთის დამოუკიდებლობას აღიარებენ.
ნინო ექვთიმიშვილი