მსოფლიო

საქართველომ უნდა წაიყვანოს შვედეთში გასამართლებული საქართველოს მოქალაქეები, ჩვენი ციხეები საკუთარი დამნაშავეებისთვის გვჭირდება - შვედი მინისტრი

დღეს სტოკჰოლმში შვედეთის იუსტიციის მინისტრი მორგან იოჰანსონი საქართველოს შს მინისტრ გიორგი გახარიას შეხვდება. იოჰანსონი აპირებს, მოითხოვოს გახარიასგან, რომ საქართველომ უზრუნველყოს სამშობლოში თავისი მოქალაქეების გადაყვანა, ვინც გასამართლებულია შვედეთში ჩადენილი დანაშაულისთვის.

„ესაა საქართველოს მოქალაქეები, რომლებსაც არანაირი კავშირი არ აქვთ შვედეთთან და კანონის მიხედვით, მათი საქართველოში დაბრუნება შესაძლებელია.

მეორე მიზეზი იმაში მდგომარეობს, რომ ჩვენ შვედეთში ციხეები საკუთარი დამნაშავეებისთვის გვჭირდება“, - თქვა იოჰანსონმა.

პოლიციის მონაცემებით, შვედეთში ქურდობების თითქმის ნახევარი ჩადენილია უცხოელების მიერ, ქურდობის გარდა, მანქანების გატაცებებისა და მოხუცებულების წინააღმდეგ ჩადენილი დანაშაულების უკან უმეტეს შემთხვევებში ასევე უცხოელები დგანან. დამნაშავეებს შორის სჭარბობენ საქართველოს, რუმინეთის, ლიტვისა და პოლონეთის მოქალაქეები. შვედეთი ამ ქვეყნებთანაც აწარმოებს მოლაპარაკებებს.

იოჰანსონის თქმით, ქართულმა მხარემ საერთაშორისო სამართლის მიხედვით, უნდა მიიღოს, მაგალითად შვედეთში გასამართლებული საქართველოს მოქალაქეები, თუმცა ბოლო 10 წლის განმავლობაში ეს არ მომხდარა. შვედი მინისტრის თქმით, ამის მიზეზად თბილისი ასახელებს ციხეებში საკმარისი ადგილების არარსებობას.

იოჰანსონის შეფასებით, საქართველო ევროპასთან უვიზო მიმოსვლის შენარჩუნების გამო დათანხმდება შვედეთის მოთხოვნებს.