საზოგადოება

საქართველოს 6-ს მოქალაქეს აქვს სხვადასხვა ხარისხის დაზიანება, თუმცა ისინი მკურნალობას ადგილზე გადიან - საქართველოს ელჩი საბერძნეთში

საბერძნეთში ხანძრის შედეგად საქართველოს 6 მოქალაქე დაშავდა. ამის შესახებ საბერძნეთსა და სერბეთში საქართველოს საგანგებო და სრულუფლებიანი ელჩი იოსებ ნანობაშვილი იტყობინება.

ათენში მცხოვრები ქართველი ემიგრანტის, კესარია სამხარაძის თქმით, ამჟამად საქართველოს ერთ მოქალაქეს ეძებენ.

„გარდაცვლილები არიან 80-ზე მეტი, მაგრამ არ შეუძლიათ აღმოჩენა, ვინ არიან, რადგან მათი მდგომარეობა ძალიან ცუდია. დე ენ ემ-ით დაადგენენ, თუ ვინმე ქართველია, არ იციან. ჯერჯერობით ვერც იტყვიან იმიტომ, რომ ჯერ არ აქვთ დამთავრებული ძებნა. დამწვარი სახლები არის 2300, ნანახი აქვთ მხოლოდ 500. ერთ ქალს ეძებენ ქართველს, იმიტომ რომ თვითონ იმ ქალმა დარეკა საქართველოში და უთქვამს, რომ ვიწვებიო და გაითიშა“, -თქვა სამხარაძემ.

ელჩის განცხადებით, აღნიშნულ ქალთან დაკავშირებით ინფორმაცია შესაბამის უწყებებთან 2-ჯერ მოწმდება.

„იყო ერთი ზარი, რომელიც სავარაუდოდ არ უკავშირდება ხანძარს, ამ სპეციფიკურ პიროვნებას ვეძებთ კონკრეტული მიმართულებით. ინფორმაცია მოწმდება დღეში ორჯერ. შინაგან საქმეთა სამინისტროს ბაზაში არცერთი ქართველი არ ფიქსირდება, რომელიც შეიძლება იყოს გარდაცვლილი ან ჰოსპიტალიზირებული. 6-ს აქვს სხვადასხვა ხარისხის დაზიანება, თუმცა ისინი მკურნალობას ადგილზე გადიან“,- თქვა ნანობაშვილმა.