საზოგადოება

საქართველოს არცერთ მდინარეში ბანაობა არაა მიზანშეწონილი - ნინო ჩხობაძე

არასამთავრობო ორგანიზაცია „საქართველოს მწვანეები - დედამიწის მეგობრების“ თავმჯდომარის ნინო ჩხობაძის განცხადებით, მდინარეების დაბინძურების დონის გამო იქ ბანაობა არამიზანშეწონილია.

„იქიდან გამომდინარე, რომ 27 000 მდინარიდან ჩვენ აღარ დაგვრჩა არცერთი სუფთა მდინარე, გარდა იმისა, რომ ეს პრობლემა არის უფრო გლობალური, უფრო სერიოზული, არცერთი მდინარე არ დარჩა საქართველოში, რომელიც დაბინძურებულია არა მარტო საყოფაცხოვრებლო ნარჩენებით, არამედ იქ იყრება დავარდნილი ლეში, საქონელი, ყველაფერი, რაც არის ყოვლად დაუშვებელი და ნიშნავს იმას, რომ საქართველოს არცერთ მდინარეში არ არის მიზანშეწონილი ბანაობა“, - განაცხადა ჩხობაძემ დღევანდელ პრესკონფერენციაზე.

მისი განმარტებით, მდინარეებში საგანგაშო სიტუაცია გამოიწვია როგორც მოსახლეობის დაბალმა თვითშეგნებამ, ასევე სოფლებსა და სხვა საცხოვრებელ პუნქტებში ნაგავსაყრელების არარსებობამ, რომელიც აიძულებს ადგილობრივ მოსახლეობას, ნარჩენები მდინარეში გადაყაროს.

ჩხობაძის თქმით, საქართველო, ასოცირების ხელშეკრულებიდან გამომდინარე, უნდა შეუერთდეს 4 დირექტივას, რომელიც მდინარეების დასუფთავებასა და მათზე ზედამხედველობას ეხება.

„ასოცირების ხელშეკრულებიდან გამომდინარე, ჩვენ 4 დირექტივას უნდა შევუერთდეთ და ავამოქმედოთ. ერთერთია წყლის ჩარჩო-დირექტივა და ერთერთია საბანაო წყლების დირექტივა, რომელიც ნიშნავს, რომ ყველა წყალი, ყველა წყალსაცავი, სადაც მოსახლეობას უყვარს ბანაობა, სისტემატურად უნდა მოწმდებოდეს და მოსახლეობას უნდა ჰქონდეს ინფორმაცია, შეიძლება თუ არა იქ ბანაობა. აქედან გამომდინარე, შეიძლება ვერცერთმა ტბამ , ვერცერთმა მდინარემ ვერ უზრუნველყოს ის სტანდარტი, რომ იქ ბანაობა შეიძლებოდეს, იმიტომ რომ ჩვენთან ასეთი ტიპის დაკვირვებები მინიმალურია“, - განაცხადა ჩხობაძემ.

ანა მებურიშვილი