საზოგადოება

საქართველოს ელჩმა ტოჩინოშინს ღირსების ორდენი გადასცა

იაპონიაში საქართველოს საგანგებო და სრულუფლებიანმა ელჩმა, ლევან ცინცაძემ ქართველ სუმოისტს , ტოჩინოშინს (ლევან გორგაძე) ღირსების ორდენი გადასცა. ღონისძიების აღსანიშნავად საქართველოს საელჩოში საზეიმო მიღება გაიმართა.ჯილდო ტოშინოშინს საქართველოს პრეზიდენტის, გიორგი მარგველაშვილის განკარგულებით მიენიჭა.

მოწვეულ სტუმრებს სიტყვით მიმართეს საქართველოს ელჩმა, ტოჩინოშინმა და ქართველმა სუმოისტმა გაგამარუმ (თეიმურაზ ჯუღელი).

იაპონიის საგარეო საქმეთა სამინისტროს ევროპის განყოფილების დირექტორმა იასუში მასაკიმ წაიკითხა საგარეო საქმეთა მინისტრის მიერ გამოგზავნილი მისალოცი წერილი, რომელშიც მილოცვასთან ერთად გამოთქმული იყო მინისტრის მზადყოფნა იმუშაოს საქართველოსთან არსებული მჭიდრო ურთიერთობების გაღრმავებისაკენ.

საზეიმო ცერემონიალს ესწრებოდნენ იაპონიაში აკრედიტებული დიპლომატიური კორპუსის და ქართული დიასპორის წარმომადგენლები. ასევე იაპონიის მთავრობისა და ბიზნეს-კორპორაციების წევრები და სხვა მოწვეული სტუმრები.

ღონისძიებაზე წარმოდგენილი იყო ქართული ღვინო და კერძები.