პოლიტიკა

საქართველოს მოქალაქეობის მიღების საგამონაკლისო წესი რთულდება - გიორგი აბაშიშვილი

საქართველოს მოქალაქეობის მიღების საგამონაკლისო წესი მკაცრდება. ამის შესახებ პრეზიდენტის ადმინისტრაციის ხელმძღვანელმა გიორგი აბაშიშვილმა განაცხადა.

აბაშიშვილის განმარტებით, კრიტერიუმების გართულება უკავშირდება საქართველოს მოქალაქეობის მიღების გაზრდილ მოთხოვნაზე ევროკავშირთან უვიზო რეჟიმის ამოქმედების შემდეგ.

აბაშიშვილმა აღნიშნა, რომ პრეზიდენტის ადმინისტრაცია ამ საკითხზე კონსულტაციებს გამართავს იუსტიციის სამინისტროსთან და სახელმწიფო უსაფრთხოების სამსახურთან.

„არსებული სტატისტიკის თანახმად, სულ უფრო მზარდი ხდება იმ პირთა რიცხვი, რომელთაც საქართველოს მოქალაქეობის მინიჭება საგამონაკლისო წესით სურთ. პირველ სექტემბრამდე, საქართველოს პრეზიდენტის მიერ საგამონაკლისო წესით მოქალაქეობის მინიჭება საკმაოდ ლიბერალური ხასიათს ატარებდა, თუმცა ახალი რეალობიდან გამომდინარე, როდესაც საქართველოს მოქალაქეობა განსაკუთრებით მოთხოვნადი ხდება, საჭიროა, კიდევ უფრო მეტი სიფრთხილის გამოჩენა და მოქალაქეობის მინიჭებასთან დაკავშირებით მიდგომების სრულყოფა და დახვეწა. შესაბამისად, საქართველოს პრეზიდენტის გადაწყვეტილებით, დღეიდან კიდევ უფრო მეტად იხვეწება მიდგომები საქართველოს მოქალაქეობის საგამონაკლისო წესით მინიჭებასთან დაკავშირებით. პრეზიდენტი თვლის, რომ მნიშვნელოვანია, საზოგადოების წევრების ჩართულობა მოქალაქეობის მინიჭების პროცესში. შესაბამისად, აღნიშულ საკითხებთან დაკავშირებით იუსტიციის სამინისტროსთან და სახელმწიფო უსაფრთხოების სამსახურთან მოლაპარაკებებს ვიწყებ“, - თქვა აბაშიშვილმა.

საქართველოს კონსტიტუციის მე-12 მუხლის მე-2 პუნქტის შესაბამისად, საქართველოს პრეზიდენტმა საქართველოს მოქალაქეობა საგამონაკლისო წესით შეიძლება მიანიჭოს სხვა ქვეყნის მოქალაქეს, რომელსაც საქართველოს წინაშე განსაკუთრებული დამსახურება აქვს ან რომლისათვისაც საქართველოს მოქალაქეობის მინიჭება გამომდინარეობს სახელმწიფო ინტერესებიდან.

ანა მებურიშვილი