საზოგადოება
საქართველოს საზღვრის გადმოკვეთისას ე.წ. კანონიერ ქურდებს მხოლოდ მათ მიერ დანაშაულის ჩადენის დამტკიცების შემთხვევაში დააკავებენ
შინაგან საქმეთა მინისტრის მოადგილის, ნათია მეზვრიშვილის ინფორმაციით, უწყების მიერ მომზადებული კანონპროექტის ამოქმედების შემთხვევაში, ე.წ. კანონიერ ქურდებს საზღვრის გადმოკვეთისას მხოლოდ მაშინ დააკავებენ, თუკი დადასტურდება, რომ მათ ქვეყნის ტერიტორიაზე დანაშაული ჩაიდინეს.
„საქართველოში საზღვრის გადმოკვეთის შემდეგ, ე.წ. კრიმინალური ავტორიტეტის დასჯა მოხდება, თუკი ჩვენ გამოძიების ეტაპზე დავადასტურებთ, რომ ამ ადამიანებს რაიმე ფორმით გავლენა აქვთ მოხდენილი საქართველოში, მაგალითად, დანაშაულებრივ საქმიანობაზე, ან მონაწილეობა აქვთ მიღებული თუნდაც ელექტრონული კომუნიკაციით რაიმე დანაშაულში. ჩვენ გვჭირდება მტკიცებულებები, რათა დადგეს გამამტყუნებელი განაჩენი. უნდა დავადასტუროთ ეს. მტკიცებულებების გარეშე ხომ ვერ დავაკავებთ? მხოლოდ აღიარების საფუძველზე პირი ვერ დაისჯება. მტკიცების მიმართულებით ჯერ კიდევ არსებული კანონმდებლობა პრობლემებს ქმნიდა. თუ გვექნება აღიარებასთან ერთად მტკიცებულებების ერთობლიობა დადგება პასუხისმგებლობის საკითხი“, – უთხრა მეზვრიშვილმა პირველ არხს.
მინისტრის მოადგილემ იმედი გამოთქვა, რომ ახალი პროექტის ამოქმედების შემდეგ გამამტყუნებელი განაჩენების სტატისტიკა გაიზრდება.
როგორც ცნობილია, ე.წ. კანონიერ ქურდებს საქართველოში საზღვრის გადმოკვეთისთანავე აკავებდნენ კანონიერი ქურდობის ბრალდებით.
ამ მუხლით დაკავებულების დიდი ნაწილი 2014 წლიდან სასამართლოს გამამართლებელი განაჩენით ტოვებდა, რადგან, როგორც სფეროზე მომუშავე ექსპერტები ამბობენ, ბრალდების მხარეს მხოლოდ აღიარებითი ჩვენებით, ან სტატუსით – „კანონიერი ქურდი“ დანაშაულის მტკიცება უჭირდა.
მხოლოდ 2017 წლის განმავლობაში 10-დან 9 ე.წ. კანონიერი ქურდი გამართლდა.