პოლიტიკა
საქართველოსა და ევროპის პოლიციას შორის სტრატეგიული თანამშრომლობის შესახებ შეთანხმების პროექტი დამტკიცდა- გიორგი მღებრიშვილი
საქართველოს შინაგან საქმეთა მინისტრის, გიორგი მღებრიშვილის განცხადებით, ევროპის პარლამენტმა საქართველოსა და ევროპოლს შორის შეთანხმების პროექტი დაამტკიცა.
როგორც მინისტრმა სპეციალურ ბრიფინგზე აღნიშნა ევროპარლამენტის გადაწყვეტილება არის მნიშვნელოვანი წინ გადადგმული ნაბიჯი საქართველოს ევროინტეგრაციის პროცესში.
„ევროპის პარლამენტმა პლენარულ სხდომაზე დაამტკიცა საქართველოსა და ევროპის პოლიციის სამსახურს შორის ოპერატიული და სტრატეგიული თანამშრომლობის შესახებ შეთანხმების პროექტი. პროცედურის თანახმად, ევროკავშირის საბჭო გასცემს უფლებამოსილებას ევროპოლის დირექტორზე, რომელიც უახლოეს მომავალში საქართველოში ჩამოვა და ჩვენ ამ შეთანხმებას ორმხრივი ხელმოწერით განვამტკიცებთ. ევროპოლთან აღნიშნული შეთანხმების გაფორმებაზე საქართველოს შინაგან საქმეთა სამინისტრო ინტენსიურად მუშაობდა. 2015 წლის ივნისში ევროპოლის ექსპერტებმა ადგილზე შეაფასეს საქართველოში არსებული პერსონალური მონაცემების დაცვის ხარისხი და იმავე წლის დეკემბერში დადებითი დასკვნა მიიღეს, რაც იმას ნიშნავდა, რომ საქართველოს შინაგან საქმეთა სამინისტრო სრულად აკმაყოფილებდა ევროპოლის სტანდარტებს პერსონალური მონაცემების დაცვის კუთხით“, - განაცხადა გიორგი მღებრიშვილმა.
მისივე თქმით, შეთანხმების ძალაში შესვლის შემდეგ საქართველო ევროპოლის ოპერატიული პარტნიორი ქვეყანა გახდება, რაც იძლევა თანამშრომლობის შესაძლებლობას ევროპოლთან როგორც ოპერატიული, ასევე არაოპერატიული მიმართულებით.
„შეთანხმება შესაძლებლობას გვაძლევს უსაფრთხო არხის მეშვეობით გავცვალოთ ოპერატიული ინფორმაცია და მონაწილეობა მივიღოთ ევროპოლის ფარგლებში ორგანიზებულ ერთობლივ საგამოძიებო ჯგუფებში, ასევე მივიღოთ ევროპოლისგან ანალიზზე დაფუძნებული მნიშვნელოვანი საპოლიციო ინფორმაცია. შეთანხმების თანახმად, საქართველოს შინაგან საქმეთა სამინისტრო ასევე წარგზავნის ევროპოლის შტაბბინაში მეკავშირე ოფიცერს, რომელიც ევროპის პოლიციის სამსახურთან მჭიდრო და ეფექტური კავშირების დამყარებას უზრუნველყოფს. მსგავსი მაღალი დონის შეთანხმება ევროპოლს გაფორმებული აქვს ისეთ ქვეყნებთან, როგორიც არის აშშ, კანადა, ავსტრალია, ნორვეგია, შვეიცარია, ისლანდია. ევროპოლის ოპერატიული პარტნიორობა ნიშნავს, რომ საქართველო დაიმკვიდრებს ღირსეულ ადგილს ევროკავშირის ქვეყნების საპოლიციო თანამშრომლობის კავშირში. ეს ნიშნავს უფრო მეტ უსაფრთხოებას, ეს ნიშნავს უფრო მჭიდრო კომუნიკაციას ევროპის სამართალდამცავ უწყებებთან, ეს ნიშნავს ტრანსნაციონალური დანაშაულის წინააღმდეგ უფრო ეფექტურ ერთობლივ ბრძოლას. ეს ნიშნავს იმას, რომ ჩვენ უკვე გავხდით ევროპული ოჯახის ნაწილი სამართალდაცვით სფეროში“,, - აღნიშნა მინისტრმა.
მონიკა დავლიანიძე