საზოგადოება

პაპუნა ლეჟავამ ყოველწლიურ საბანკო ფორუმში მიიღო მონაწილეობა

საქართველოს ეროვნული ბანკის ვიცე-პრეზიდენტმა, პაპუნა ლეჟავამ მონაწილეობა გამოცემა The Financial-ის ორგანიზებით, ეროვნული ბანკისა და საბანკო ასოციაციის მხარდაჭერით გამართულ ყოველწლიურ საბანკო ფორუმში მიიღო.

საქართველოს ეროვნული ბანკის ინფორმაციით, ფორუმის - საბანკო სექტორის მომავალი (The Future of Banking-ის) ფარგლებში მონაწილეებმა ციფრული ტექნოლოგიების, კიბერუსაფრთხოების გაძლიერების და საფინანსო სექტორის მომხმარებელთა უფლებების დაცვის საკითხები განიხილეს.

სებ-ის ვიცე-პრეზიდენტის განცხადებით, საქართველოს ეროვნული ბანკი მუდმივად ზრუნავს ფინანსური ბაზრის განვითარებაზე. მან ყურადღება ვირტუალური აქტივების რეგულაციებზე გაამახვილა.

"2022 წლის სექტემბერში საქართველოს პარლამენტმა ცვლილებები მიიღო რამდენიმე კანონში, რითაც შექმნა საკანონმდებლო ბაზა ვირტუალური აქტივებისა და ვირტუალური აქტივების სერვისის პროვაიდერებისთვის, რომელიც ძალაში 2023 წლის 1 იანვრიდან შევიდა. მათ შორის, ცვლილებები ორგანულ კანონს საქართველოს ეროვნული ბანკის შესახებ ეხებოდა და საქართველოს კანონს ფულის გათეთრებისა და ტერორიზმის დაფინანსების აღკვეთის ხელშეწყობის შესახებ. შემოთავაზებული ცვლილებების პროექტი ეფუძნებოდა ფინანსურ ღონისძიებათა ჯგუფის (FATF) რეკომენდაციებს და სხვა იურისდიქციების პრაქტიკულ გამოცდილებას. საქართველოს ეროვნული ბანკი გააგრძელებს საერთაშორისო გამოცდილების შესწავლას და გაითვალისწინებს უცხოელი მარეგულირებელ ორგანოებთან თანამშრომლობის გამოცდილებას. ეს უზრუნველყოფს თანამშრომლობას და კოორდინაციას ვირტუალური აქტივების ეკოსისტემის მარეგულირებელი და საზედამხედველო სირთულეების დასაძლევად," - აღნიშნა პაპუნა ლეჟავამ.

ეროვნული ბანკის ვიცე-პრეზიდენტის განცხადებით, ფინანსურ სექტორში ინოვაციების ტემპი სულ უფრო იზრდება, რასაც, როგორც ახალი შესაძლებლობები, ასევე ახალი რისკები მოაქვს. ახალი ტექნოლოგიების ხელშესაწყობად და ფინტექის ეკოსისტემის განვითარების მიზნით, ეროვნულმა ბანკმა არაერთი წარმატებული ნაბიჯი გადადგა.

მათივე ცნობით, ღონისძიებას საფინანსო სექტორის, საერთაშორისო ორგანიზაციების და საჯარო სექტორის წარმომადგენლები დაესწრნენ.