უახლესი ამბები
არქივი
საზოგადოება
საქართველოში ჰაერის დაბინძურების 71% ავტოსატრანსპორტო საშუალებებზე მოდის - აუდიტის სამსახური
სახელმწიფო აუდიტის სამსახურის ანგარიშის თანახმად, ქვეყანაში ჰაერის დაბინძურების 71% ავტოსატრანსპორტო საშუალებებზე მოდის.
ამასთან, როგორც ჰაერის დაბინძურების მდგომარეობის შესახებ სახელმწიფო აუდიტის სამსახურის მიერ გამოქვეყნებულ ანგარიშშია ნათქვამი, ავტოსატრანსპორტო საშუალებების 37% თბილისშია თავმოყრილი.
დოკუმენტის განხილვა პარლამენტის სპეციალურ სამუშაო ჯგუფში მიმდინარეობს.
აუდიტის სამსახურის ანგარიშის მიხედვით, 2015 წელს სავალდებულო პერიოდული ტექნიკური ინსპექტირება ავტოსატრანსპორტო საშუალებების 76%–ს არ გაუვლია, რაზეც საპატრულო პოლიციის რეაგირება საკმაოდ დაბალი იყო და 2016 წლისათვის მხოლოდ 13,6% დაჯარიმება მოხდა.
ანგარიშში ასევე ნათქვამია, რომ პერიოდული ტექნიკური ინსპექტირების მონიტორინგის ინფორმაციულ სისტემასთან საპატრულო პოლიციის სამსახურს არ ჰქონდა წვდომა და შესაბამისად, არ იყო ინფორმირებული, რომელ ავტოსატრანსპორტო საშუალებებს არ აქვს გავლილი სავალდებულო ინსპექტირება.
აუდიტის სამსახურის ინფორმაციითვე, მუნიციპალური ავტობუსების უმრავლესობა შიდა წვის სისტემის სიძველისა და მისი აღდგენის შეუძლებლობის გამო პერიოდულ ტექნიკურ ინსპექტირებას ვერ გადის. 2016 წლის ოქტომბრისა და 2017 წლის აპრილის პერიოდში, თბილისში მოძრავი მიკროავტობუსების დაახლოებით 25% არ გამოცხადდა მათთვის სავალდებულო ტექნიკური ინსპექტირების გასავლელად, ხოლო 2017 წლის აპრილიდან – 2017 წლის ოქტომბრის პერიოდში – მიკროავტობუსების 40%.
ამასთან, როგორც ანგარიშშია ნათქვამი, ავტოსატრანსპორტო საშუალებებზე სახელმწიფოს მხრიდან კონტროლის მექანიზმი სუსტია.
„იელის უნივერსიტეტის მიერ ჩატარებული კვლევის შედეგად, ზოგადი დაბინძურების დონის მიხედვით, 2016 წელს საქართველო მსოფლიოს 180 ქვეყნიდან 111–ე ადგილს იკავებს, რაც ცხადყოფს ადამიანის ჯანმრთელობისთვის რამდენად მნიშვნელოვანია აღნიშნული საკითხის შესწავლა“, – ნათქვამია აუდიტის სამსახურის მიერ პარლამენტში წარდგენილ დოკუმენტში, რომელიც 2015 წლის 1–ლი იანვრიდან 2017 წლის 1–ელ ოქტომბრამდე პერიოდს მოიცავს.